काठमाडौं । नेपाल राष्ट्र बैंकका कर्मचारी गभर्नर महाप्रसाद अधिकारी विरुद्ध उत्रिएका छन् । बढुवाको विषयलाई लिएर कर्मचारीहरु गभर्नर अधिकारीको विरुद्धमा उत्रिएका हुन् ।
राष्ट्र बैंक कर्मचारी संघले विज्ञप्ति जारी गर्र्दै कर्मचारीको बढुवामा मनोमानी भएको भन्दै गभर्नरलाई विरोधपत्र बुझाएका छन् । संघले गभर्नरलाई बुझाएको विरोध पत्रमा बैंक व्यवस्थापनका अन्याय, अत्याचार र विभेदका विरुद्धमा तथा न्याय र समानताका पक्षमा संघ सदै लडेको र अधिकृत द्वितीय पदको पदोन्नतिको नतिजाले त्यसलाई झनै बढावा दिएको उल्लेख छ ।
उक्त नजिताले आम कर्मचारीलाई विगतका कालरात्रीको पुनः स्मरण गराएको विज्ञप्तिमा उल्लेख छ । ‘संस्थाले सुम्पिएको जिम्मेवारी र अधिकारलाई आफ्नो पैत्रिक सम्पत्ति ठान्दै मातहतका कर्मचारीलाई आस्थाको आधारमा विभेद गरी वृत्ति विकासबाट वञ्चित गर्ने दुर्भावनाबाट ग्रसित व्यवस्थापनका केही अराजक पात्रहरुका काला कर्तुत खेदजनक छ’ जारी विज्ञप्तिमा उल्लेख छ ।
समानता र न्यायको अन्तिम भरोसा र विश्वासको केन्द्रबाट समेत तदनुरुपको भूमिकाको अनुभूति पाउन नसकेको अवस्थामा कर्मचारी कसरी उत्प्रेरित हुन सक्लान ? भन्ने प्रश्न गर्दै संस्थाबाट समानता र न्यायको प्रत्याभूति हुन नसक्ने उनीहरुको बुझाई छ । बैंक व्यवस्थापनको कामले स्वतन्त्र न्याय सम्पादन माथि नै प्रश्न उब्जाएको भन्दै ‘बुढी मरी भन्ने चिन्ता मात्र होइन, काल पल्किने डर’ आमकर्मचारीमा देखिएको समेत वित्रप्तिमा उल्लेख छ ।
आगामी दिनमा समेत यस्ता प्रवृत्तिले निरन्तरता पाउने र उच्च व्यवस्थापन मुकदर्शक बन्दै जाने हो भने आम कर्मचारीहरुको बृहत्तर हितमा निरन्तर आवाज उठाइरहेको संघले पात्र, प्रवृत्तिको विरुद्धमा थप विरोध कार्यक्रम गर्ने समेत जनाएको छ ।
वि.सं.२०७७ माघ २३ शुक्रवार १७:१० मा प्रकाशित
