काठमाडौं । सेयर बजारले नयाँ रेकर्ड कायम गरेको दिन आइतबार ८०.०६ प्रतिशत सेयर कारोबार अनलान प्रणालीबाट भएको छ ।
यो दिन ५० हजार ९२३ जना लगानीकर्ताले गरेको कारोबारमा ८०.०६ प्रतिशतले अनलाइनबाट भएको नेप्सेले जनाएको छ । नेप्सेका अनुसार अहिलेसम्म ३ लाख २७ हजार भन्दा बढी लगानीकर्ताले अनलाइनको युजरनेम र पासवर्ड लिएका छन् ।
नेप्सेका अनुसार आइतबार ८७ हजार ६७० कारोबारमा १० अर्ब ४४ करोड १९ लाख ५१ हजार ३०४ रुपैयाँको १ करोड ७७ लाख ३६ हजार ७३४कित्ता सेयर किनबेच भएको छ । नेप्से सूचक २५२४ बिन्दु कायम भएको छ । कारोबार रकम तथा बजार परिसूचकमा आधारमा धितोपत्रको दोस्रो बजारमा नयाँ कीर्तिमान हो ।
पछिल्लो समय लगानीकर्ताहरुको दोस्रो बजारमा उत्साहजनक सहभागीता बढेको छ । यसको निरन्तरताको लागि सेवालाई सहज, सुरक्षित र विश्वसनीय तथा पारदर्शी बनाउने नेप्सेको उद्देश्य रहेको विज्ञप्तिमा उल्लेख छ ।
त्यसको लागि नेप्सेले प्राविधिक, नीतिगत तथा संस्थागत पूर्वाधारहरुमा सुधार गरेको जानकारी गराएको छ । लगानीकर्ताको लगानीको हित संरक्षणका लागि नेप्से तयार रहेको जनाएको छ ।
वि.सं.२०७७ माघ २५ आइतवार १७:०६ मा प्रकाशित