काठमाडौं । प्रधानमन्त्री एवं नेपाल कम्युुनिष्ट पार्टीका अध्यक्ष केपी शर्मा ओलीले बैंक र वित्तीय संस्था फस्टाउन भन्ने पक्षमा आफू रहेको बताउनस भएको छ ।
नेपाल राष्ट्रिय उद्योग व्यवसाय महासंघद्वारा राजधानीमा आयोजित राष्ट्रिय उद्योग ब्यवसायी भेलामा प्रधानमन्त्री ओलीले यस्तो बताउनु भएको हो । उहाँले बैंक र वित्तीय संस्था फस्टाएसँगै त्यसबाट ऋण लिएर काम गर्ने व्यवसायीहरु पनि त्यसको सावाँ ब्याज तिर्न सक्ने अवस्था हुनुपर्ने धारणा राख्नुभयो ।
उहाँले उत्पादन बढाउने र रोजगारी सृजना गर्ने काममा बढी ध्यान दिन उद्योग व्यवसायीहरूलाई आह्वान समेत गर्नुभयो । ‘सकेसम्म हाम्रा जमिन, जंगल, जडिबुटी आदिको कसरी अघिकतम् सदुपयोग गर्न सकिन्छ । त्यतापट्टी लाग्नुस् । सरकारले पूर्ण सहयोग गर्छ’ ओलीले भन्नुभयो,‘यो सरकार हुतिहारा खालको सरकार होइन । दृढता भएको केही गरौं भन्ने सरकार हो ।’
प्रधानमन्त्री ओलीले कोभिड-१९का कारण प्रतिकुल असर परेका बेला कुनै कुनै क्षेत्रले अधिक लाभ लिने र कुनै अत्यधिक खस्किने कुरा हुन नसक्ने समेत बताउनुभयो । कोभिड-१९ ले पारेको प्रतिकुल अवस्थाका बाबजुद नेपालको आर्थिक अवस्था नखस्किएको उल्लेख गर्दै प्रधानमन्त्रीले अहिलेको प्रगति कायम राख्न सकिए सन् २०२२ सम्ममा दोहोरो अंकको आर्थिक वृद्धि हासिल गर्न सकिने बताउनु भयो ।
ओलीले सरकारले गरेका काम लिएर जनतासम्म जान पनि उद्योगी र व्यवसायीहरुलाई आग्रह गर्नुभयो । पार्टीका केही नेताहरुले सरकारलाई सहयोग गरेको भए धेरै काम गर्न सकिने अवस्था रहेको उहाँको भनाई थियो । ‘पार्टीका शीर्ष नेताहरुमा कुनै ठाउँमा खुट्टा टेक्दा केपि ओलीलाई फाइदा हुन्छ भने त्यहाँ नटेकेर अन्तै टेक्ने प्रवृत्ति छ ’ प्रधानमन्त्रीले भन्नुभयो । सभाहरुमा समेत १६ जना मान्छे लाइन लागेर सबैले एउटै ‘केपि ओली’ केपि ओली’ केपि ओली’ मात्र भन्ने गरेको तर देश र दुःख पाएका जनता नसम्झिएको पनि प्रधानमन्त्रीले उल्लेख गर्नुभयो ।
वि.सं.२०७७ फागुन ३ सोमवार १७:३६ मा प्रकाशित
