काठमाडौं । सर्वाेच्च अदालतले ऋषिराम कट्टेलको पक्षमा फैसला सुनाएको छ । अदालतले ऋषिराम कट्टेलको नेकपालाई आधिकारिकता दिएको छ । अदालतको निर्णयपछि पुन नेकपा एमाले र माओवादी केन्द्रको उदय भएको छ ।
आइतबार सर्वोच्चका न्यायाधीशद्वय बमबहादुर श्रेष्ठ र कुमार रेग्मीको संयुक्त इजलासले नेपाल कम्युनिष्ट पार्टी (नेकपा) ऋषिराम कट्टेलको भएको फैसला सुनाउनु भएको हो ।
फैसलामा निर्वाचन आयोगमा राजनीतिक दलका रुपमा दर्ता रहेका नेपाल कम्युनिष्ट पार्टी (एकीकृत, माक्र्सवादी, लेनिनवादी) र नेपाल कम्युनिष्ट पार्टी (माओवादी केन्द्र) अलग अलग राजनीतिक दलका रुपमा साविककै अवस्थामा कायम रहने हुँदा, अब यी दुई राजनीतिक दलले एकीकरण गर्ने भएमा राजनीतिक दल सम्बन्धि ऐन तथा नियम विपरीत नहुने गरी निर्णय गरी अविलम्ब निर्वाचन आयोगमा उपस्थित हुन जानकारी दिइ शीर्ष कानून बमोजिम आवश्यक निर्णय गराउनु भनि विपक्षीमध्येका निर्वाचन आयोगका नाममा परमादेश समेत जारी गरिदिएको छ ।
आदेशको प्रतिलिपि साथै राखी सो को जानकारी विपक्षिहरुलाई दिनु र आदेशको विद्युतीय प्रति इन्टरनेटमा अपलोड गरी मिसिल नियमानुसार अभिलेख शाखामा बुझाईदिनु, भनिएको छ । २०७५ जेठ ३ गते नेकपा एमाले र माओवादी केन्द्रबीच पार्टी एकता भएर नेकपा बनेको थियो । अदालतको निर्णयसँगै नेकपाल २०७५ जेठ ३ गते भन्द अगाडिको अवस्थामा फर्किएको छ ।– प्रशिक्षार्थी पत्रकार
वि.सं.२०७७ फागुन २३ आइतवार १६:१६ मा प्रकाशित