काठमाडौं । बुक बिल्डिङ विधिबाट साधारण सेयर (आईपीओ) निष्काशन गर्न लागेको सर्वोत्तम सिमेन्टले आफ्नो उत्पादन क्षमता बढाएको छ ।
कोरोनाको महामारीले थलिएको सिमेन्ट उद्योग पछिल्लो समयमा निकै चलायमान भएको छ । कोरोना असरपछि पछिल्लो समयमा सिमेन्टको उत्पादन बढेको बताइएको छ । अहिले उद्योग पूर्ण क्षमता सञ्चलानमा आएको बताइएको छ ।
उद्योगको खानी पाल्पा जिल्लामा रहेको छ भने उद्योग भने नवपरासीमा रहेको छ । उद्योगको उत्पादन क्षमता बढेसँगै माग पनि बढेको सर्वोत्तम सिमेन्टका बिक्री विभागका प्रमुख सुवास पाण्डेले अर्थतन्त्रलाई जानकारी गराउनु भयो ।
पाण्डेका अनुसार हाल दैनिक ६० हजार बोरा सिमेन्ट उत्पादन गरी बजारमा पठाएको छ । ‘सर्वोत्तम सिमेन्ट पूर्ण क्षमतामा चलिरहेको छ, माग पनि उत्तिकै बढेको छ’, पाण्डेले भन्नुभयो ।
पाण्डेका अनुसार अहिले दैनिक ६० हजार बोरा नै खपत हुने गरेको छ । कोरोनाको महामारिपछि कम्पनीले व्यवसाय विस्तारलाई पनि तीब्रता दिएको छ ।
‘अहिले देशमा पूर्वाधार निर्माणको सिजन सुरु भएको छ, त्यसकारण पनि माग बढी भएको छ’,-पाण्डेले भन्नुभयो, ‘समग्रगमा सबै क्षेत्रबाट मागको चाप बढी रहेको छ, पछिल्लो समयमा अत्याधिक मात्रामा घर निर्माणका लागि सिमेन्टको माग बढेको छ ।’
अन्य भौतिक पूर्वाधारको क्षेत्रमा पनि सिमेन्टको माग भइरहेको उहाँको भनाइ छ । सर्वोत्तम सिमेन्टले ग्रिन पीएससी सिमेन्ट र सर्वोत्तम ग्रिन ओपीसी समेन्ट उत्पादन गरिरहेको छ ।
यूरोपियन भिआरएम मेशिनबाट उत्पादित सार्वेत्तम नेपालकै एकमात्र पहिलो ४५०० ब्लेन सम्मको मसिनोपन भएको सिमेन्ट हो ।
वि.सं.२०७७ फागुन २६ बुधवार १७:४४ मा प्रकाशित
