काठमाडौं । गोरखाको धार्चे गाउँपालिकामा भोलि अर्थात बैशाख १ गतेदेखि ४ गतेसम्म लगातार बिदा हुने भएको छ । नयाँ वर्षको अवसरमा गाउँपालिकाले कर्मचारीलाई दिएको थप तीन दिनसहित ४ गतेसम्म बिदा हुने भएको हो ।
गाउँपालिकाले बैशाख २, ३ र ४ गते बिदा दिएको थियो । यद्यपि ४ गते भने शनिबार पनि रहेको रहेको छ, भने बैशाख १ गते नयाँ वर्षको अवसरमा सरकारले नै सार्वजनिक बिदा दिएको छ ।
गाउपालिकाले आन्तरिक पर्यटन प्रवर्द्धन गर्ने उद्देश्यले आफ्ना कर्मचारीहरूलाई नयाँ वर्षमा थप तीन दिन दिएको गाउपालिकाका प्रमुख प्रशासकीय अधिकृत राम बहादुर अधिकारीले अर्थतन्त्रलाई जानकारी दिनुभयो ।
आन्तरिक पर्यटन प्रवर्द्धनका लागि नयाँ वर्षमा कर्मचारीहरुलाई गाउँपालिकाका विभिन्न क्षेत्रमा भ्रमण गर्नका लागि बिदा दिएको गाउपालिकाले जनाएको छ ।
कर्मचारीहरूलाई गाउँपालिकाको बारेमा बुझ्न पनि सजिलो हुने र सरुवा भएर अन्यत्र गएपछि गाउँपालिकाको पर्यटकीय क्षेत्रको पनि प्रचारप्रसार हुने गाउँपालिकाले विश्वास लिएको छ ।
वि.सं.२०७७ चैत ३१ मंगलवार १६:३७ मा प्रकाशित
