काठमाडौं । हिमालयन जनरल इन्स्योरेन्सले चालु आर्थिक वर्षको तेस्रो त्रैमासिक वित्तीय अवस्था सार्वजनिक गरेको छ । कम्पनीले सार्वजनिक गरेको वित्तीय विवरण अनुसार नाफा घटेको देखिएको छ ।
गत वर्षको तेस्रो त्रैमासको तुलनामा यो वर्षको सोही अवधिमा कम्पीनको नाफा १९.१३ प्रतिशतले घटेको हो ।चालु आवको तेस्रो त्रैमासमा कम्पनीले ९ करोड १० लाख ३४ हजार रुपैयाँ नाफा कमाएको छ । गत वर्षको सोही अवधिमा कम्पनीले ११ करोड २५ लाख ७४ हजार रुपैयाँ नाफा कमाएको थियो ।
कम्पनीको चुक्तापूँजी १ अर्ब ६ करोड ८२ लाख ८८ हजार रुपैयाँ पुगेको छ । कम्पनीको जगेडा तथा कोषमा २८ करोड ६६ लाख ३० हजार रुपैयाँ रहेको छ । बीमा कोषमा ६० करोड ७४ लाख ५२ हजार रुपैयाँ रहेको कम्पनीले महा बिपत्ती कोषमा भने ५ करोड ११ लाख ५७ हजार रुपैयाँ रहेको छ ।
चैत मसान्तसम्म कम्पनीले ९१ करोड ८५ लाख १५ हजार रुपैयाँ कुल बीमा शुल्क आर्जन गरेको छ । गत वर्षको सोही अवधिको तुलनामा कुल बीमा शुल्क आर्जन ६.४३ प्रतिशतले बढेको हो । गत वर्षको सोही अवधिमा कम्पनीले ८६ करोड ३० लाख २२ हजार रुपैयाँ आर्जन गरेको थियो ।
चालु आवको तेस्रो त्रैमाससम्म कम्पनीले १ अर्ब ५४ करोड ८८ लाख ८३ हजार रुपैयाँ कुल दावी भुक्तानी गरेको छ । गत वर्षको सोही अवधिमा २२ करोड ८१ लाख ४ हजार रुपैयाँ भुक्तानी गरेको थियो । चैतसमान्तसम्म भुक्तानी हुन बाँकी रकम भने ५४ करोड ७४ लाख ८१ हजार रुपैयाँ छ ।
कम्पनीको प्रतिसेयर आम्दानी ११ रुपैयाँ ३६ पैसा, प्रतिसेयर नेटवर्थ १८८ रुपैयाँ ४८ पैसा रहेको छ ।
वि.सं.२०७८ वैशाख २२ बुधवार १३:३४ मा प्रकाशित