काठमाडौं । चालु आर्थिक वर्षको १० महिनामा निर्यात ३२.१९ प्रतिशतले बढ्दा आयात २२.३४ प्रतिशतले मात्रै बढेको छ ।
भन्सार विभागको तथ्याङक अनुसार गत वैशाख मसान्तसम्ममा ८२ अर्ब ६ करोड ५७ लाख ६९ हजार रुपैयाँको वस्तु तथा सेवा निर्यात भएकोमा यो वर्षको वैशाखसम्ममा निर्यात ३२.१९ प्रतिशतले बढेर १ खर्ब ८ अर्ब ४७ करोड ९७ लाख ५६ हजार रुपैयाँ पुगेको छ ।
यस्तै गत वैशाखमा १० खर्ब २५ अर्ब १३ करोड ७७ लाख ८३ हजार रुपैयाँको वस्तु तथा सेवा आयात भएकोमा चालु आवको सोही अवधिमा आपुग्दा २२.३४ प्रतिशतले बढेर १२ खर्ब ५४ अर्ब ११ करोड १ लाख ७९ हजार रुपैयाँ पुगेको छ ।
विभागमा अनुसार यो चालु आवको १० महिनामा वैदेशिक व्यापारघाटा २१.४८ प्रतिशतले बढेको छ । गत आवको १० महिनामा ९ खर्ब ४३ अर्ब ७ करोड ३० लाख १३ हजार रुपैयाँ रहेकोमा चालु आवको सोही अवधिमा आईपुग्दा ११ खर्ब ४५ अर्ब ६३ करोड ४ लाख २३ हजार रुपैयाँ पुगेको छ ।
विभागका अनुसार १० महिनाको अवधिमा वैदेशिक व्यापार२३.०७ प्रतिशतले बढेको छ । गत बैशाख मसान्तसम्ममा ११ खर्ब ७ अर्ब २० करोड २५ लाख ५२ हजार रुपैयाँको वैदेशिक व्यापार भएकोमा यो वैशाखसम्म आईपुग्दा १३ खर्ब ६२ अर्ब ५८ करोड ९९ लाख ३५ हजार रुपैयाँ पुगेको छ । जुन गत वर्षको तुलनामा २३ प्रतिशतले बढी हो । १० महिनाको अवधिमा आयात निर्यातको अनुपात ७.४५ प्रतिशतले घटेको छ ।
वि.सं.२०७८ जेठ १० सोमवार ०९:३९ मा प्रकाशित