काठमाडौं । अर्थ सचिव शिशिर ढुंगानाले बजेट कार्यान्वयन आजैबाट सुरु भएको बताउनु भएको छ । नेपाल आर्थिक पत्रकार समाज (सेजन) ले आयोजना गरेको भिडियो कन्फ्रेन्समार्फत आर्थिक वर्ष २०७८-०७९ को बजेट पछीको छलफल कार्यक्रम उहाँले यस्तो बताउनु भएको हो ।
उहाँले आजै केही मन्त्रालयको सचिवलाई बोलाएर बजेट कार्यान्वयनमा लाग्नेका लागि छलफल गर्ने बताउनुभयो । उहाँले कार्यक्रममा सामाजिक सुुरक्षाको दायित्व बढदै जाँदा राज्यको क्षमताले धान्छ वा धान्दैन भन्ने विषयमा ध्यान दिएको बताउनुभयो ।
‘अब सामाजिक सुरक्षा कार्यक्रम केही समय यसरी अघि बढन्छ । केही समयमा यो परिवर्तन भएर योगदानमा आधारित हुन्छ’ उहाँले भन्नुभयो ‘त्यो भयो भने राज्यलाई भार कम हुन्छ ।’ उहाँले शैक्षिक धितोकर्जा गत वर्ष १३९ जनाले लिएको स्मरण गराउँदै यसलाई प्रभावकारी बनाउन मौद्रिक नितिले काम गर्ने र यो कार्यक्रम आगामी आवमा लक्ष्यमा पुग्ने बताउनुभयो ।
यस्तै सरकारले बजारमा तरलता अभाव हुन नदिँने तथा ब्याजदर नबढने गरी आन्तरिक ऋण उठाउने र परिचालन गर्ने जानकारी पनि गराउनुभयो ।
उहाँले नेपाल एयरलाईन्सको संरचनागत परिवर्तन र रणनैतिक पार्टनर खोज्ने सरकारको तयारी रहेको बताउनु भयो । उहाँका अनुसार अब नेपाल वायुसेवा निगमलाई कम्पनी मोडलमा चलाउने सरकारको तयारी रहेको छ । यसको लागि सेयर संरचना बढाउने हो सरकारको तयारी रहेको छ । त्यो भयो भने रणनीतिक साझेदार भित्र्याउन सजिलो हुने उहाँको भनाइ छ । सरकारले पैसा हाल्दैमा राम्रो हुन्छ भन्न नसकिन भन्दै अब व्यवसायीक प्रतिस्पर्धा बढाउन तर्फ लाग्नुपर्ने बताउनु भयो ।
सचिव ढुंगानाले बजेट कार्यान्वयनका लागि सरकारले स्रोतको व्यवस्थापन गर्ने र कार्यान्वयनको शिलशिलामा समस्या भए सहजिकरण गर्न सरकार तयार रहेको बताउनु भयो । बजेट कार्यान्वयन गरेर विकासमा निर्माण सरकारले काम गर्नेछ । महामारीले रोजगारी गुमाएका जनताको लागि अभिभावको भुमिका निर्वाह गर्ने उहाँको भनाइ छ ।
सबैलाई कोरोना खोपको व्यवस्था गर्न सकेमा आर्थिक पुनरुत्थानमा लाग्ने र साउन बाट कोरोना महामारी कम हुँदै जाने भएका कारण विनियोजन गरेको बजेट खर्च हुने उहाँको दाबी छ । कार्यक्रममा उहाँले विज्ञको सुझाव र वन मन्त्रालयको सुझावमा खानीजन्य क्षेत्रको गिटी बालुवा निकासी गर्न खोजेको जानकारी गराउनुभयो । पर्यवरणमा सरकार निकै सचेत रहेको पनि बताउनुभयो ।
बीमा समितिले कोरोना बीमाका लागि अर्थ मन्त्रालयसँग पैसा मागेको र सरकारले दिएको सहमति अनुसार पैसा दिने जानकारी गराउनु भयो । ‘हामीसँग भएको रिसोर्सको परिधिमा रहेर केही समयमा नै पैसा दिने छौ्रं’ उहाँले भन्नुभयो ‘कोरोना बीमाको दाबी भुक्तानी मिलाउने छौं ।’
वि.सं.२०७८ जेठ १७ सोमवार १२:०० मा प्रकाशित