काठमाडौं । सेयर लगानीकर्ता केशव कोइरालाले नेपाल धितोपत्र बोर्डमा ३ वटा जलविद्युत कम्पनीको सेयर कारोबार रोक्का गर्न माग गर्दै निवेदन दिुनुभएको छ ।
निवेदनमा खानीखोला हाइड्रो पावर कम्पनी, जोशी हाइड्रो पावर र हिमाल दोलखा पावर कम्पनीले लामो समयदेखि वित्तीय विवरण सार्वजनिक नगरेको र गरेको पनि गलत भएको भन्दै यस्ता कम्पनीको कारोबार रोक्का गरेर छानविन गर्न माग गरिएको छ ।
नेपाल स्टक एक्सचेन्ज (नेप्से) मा सूचिकृत कम्पनीले समयमा नै वित्तीय विवरण प्रकाशित नगर्दा लगानीकर्ताहरु थप अन्यौलमा पर्ने र प्रकाशित वित्तीय विवरण गलत हुँदा लगानीकर्तामा भ्रम सृजना हुने भन्दै नेप्सेलाई बोधार्थ दिएर बोर्डमा मंगलबार निवेदन परेको हो ।
निवेदनमा उल्लेख भए अनुसार खानीखोला हाईड्रोपावरले २०७६ पुस यता कुनै पनि विवरण प्रकाशन नगरेको, जोशी हाईड्रोपावर र हिमाल दोलखा पावर कम्पनीले हालसम्म कुनै पनि वित्तीय विवरणहरु प्रकाशन नगरेको भन्दै यी कम्पनीको दोस्रो बजारमा कारोबार रोक्का गर्न माग गरिएको छ ।
खानीखोलाको २०७६ साल पौष मसान्तसम्मको वित्तीय विवरण अनुसार कम्पनीको नेटवर्थ ७ रुपैयाँ नकारात्मक रहेको र लगातारको घाटाले कम्पनीको नेटवर्थ ५० रुपैयाँभन्दा बढी नकारात्मक भएको हुनसक्ने आंकलन गरिएको छ । यस्तो कम्पनीको सेयर महँगो मूल्यमा हुँदा लगानीकर्ता डुब्ने खतरा भएकाले सूचीकरण खारेजी गर्न समेत माग गरिएको छ ।
यस्तै मंगलबार विद्युत नियमन आयोगमा पनि कोइरालाले निवेदन दिनुभएको छ । आयोगमा हाईड्रोपावर कमपनीको अनियमितता छानविन गर्न भन्दै निवेदन परेको हो । यी कम्पनीहरुले भगिनी कम्पनीमा लगानी गर्न र ऋण तिर्न हकप्रद सेयर घोषणा गरेको भन्दै ती कम्पनीले आयोगसँग अनुमति लिएको हो की होइन भन्दै निवेदन परेको हो ।
अहिले कतिपय कम्पनीका मुख्य प्रबद्र्धकले आफ्नो स्वामित्वमा रहेका सेयर बिक्री गरेर बाहिरिने क्रम बढेको भन्दै यसलाई रोक्न समेत माग गरिएको छ । बोर्ड, नेप्से र आयोगमा निवेदन परेपनि कारबाही हुनेमा भने आम लगानीकर्तामा शंका पैदा भएको छ ।
वि.सं.२०७८ जेठ १९ बुधवार ०९:३५ मा प्रकाशित
