काठमाडौं । नेपाल राष्ट्र बैंकले विदेशी लगानी तथा विदेशी ऋण व्यवस्थापन विनियमावली, २०७८ जारी गरेको छ ।
यो सँगै विदेशी लगानीका लागि आवश्यक विदेशी मुद्रा ल्याउन, लगानीपछि आर्जन गरेको नाफा लैजान, विदेशी ऋण स्वीकृति गर्न, वैदेशिक ऋण ल्याउन, विदेशी ऋणको साँवा तथा ब्याज भुक्तानीका लागि विदेशी मुद्राको सटही प्रदान गर्ने जस्ता कामलाई सजिलो भएको छ ।
राष्ट्र बैंकले ल्याएको विनियमावलीमा विदेशी लगानीकर्ताले विदेशी लगानी स्वीकृति गर्ने निकायबाट विदेशी लगानीको स्वीकृति प्राप्त गरे पश्चात सोबापतको विदेशी मुद्रा नेपाल पठाउन वा भित्र्याउन राष्ट्र बैंकबाट पूर्व स्वीकृति लिन अनिवार्य नहुने व्यवस्था गरेको छ । तर विदेशी लगानी स्वीकृत भए पश्चात विदेशी मुद्रा भित्र्याउनु वा पठाउनु पूर्व राष्ट्र बैंकले तयार पारेको ढाँचामा एकाईमा लिखित जानकारी दिनु पर्नेछ ।
विदेशी लगानीको लेखाङ्कन पनि गराउनु पर्ने छ । नेपाल भित्रिएको विदेशी लगानीबापतको रकम र प्रचलित कानूनबमोजिमको विदेशी लगानीलाई लेखाङ्कन गराउन विदेशी लगानी भएको कम्पनी-उद्योग वा विदेशी लगानीकर्ताले आवश्यक कागजातहरू संलग्न गरी विदेशी मुद्रा भित्रिएको वा विदेशी लगानी भएको छ महिनाभित्र निवदेन पेश गर्नुपर्नेछ ।
यो विनियमावली लागू हुनुपूर्व भित्रिएको विदेशी लगानी बापतको रकम वा प्रचलित व्यवस्थाबमोजिम भएको विदेशी लगानी तर लेखाङ्कन भइनसकेको हकमा त्यस्तो रकम÷लगानी लेखाङ्कनको लागि समेत यो विनियमावली लागू भएको मितिबाट बढीमा एक वर्षभित्र आवश्यक कागजात सहित निवेदन पेश गर्नुपर्नेछ ।
सम्पूर्ण कागजात सहित निवेदन प्राप्त भएको मितिले सात कार्य दिनभित्र राष्ट्र बैंकले लेखाङ्कनसम्बन्धी निर्णय गरी लेखाङ्कनको प्रमाणपत्र उपलब्ध गराउने छ । विदेशी लगानी तथा आर्जित रकम फिर्ता लैजान राष्ट्र बैंकबाट स्वीकृति प्रदान गरिने छ ।
जसमा विदेशी लगानीको शेयर बिक्रीबाट प्राप्त रकम, विदेशी लगानीबाट प्राप्त मुनाफा वा लाभांश बापतको रकम, उद्योग वा कम्पनी खारेजी वा लिक्विडेसनमा गएकोमा खारेजी वा लिक्विडेसन पश्चात सम्पूर्ण दायित्व चुक्ता गरी बाँकी रहन आउने रकम, प्रविधि हस्तान्तरण सम्झौता अन्र्तगत प्राप्त लाभ (रोयल्टी) बापतको रकम, तर, शतप्रतिशत मदिरा निकासी गर्ने मदिराजन्य उद्योग बाहेक अन्य मदिराजन्य उद्योगमा हुने प्रविधि हस्तान्तरण अन्तर्गतको ट्रेडमार्क उपभोग हुने व्यवस्था गरेको छ ।
वि.सं.२०७८ जेठ २५ मंगलवार १४:०७ मा प्रकाशित