काठमाडौं । आज प्रभु बैंकको ४० लाख कित्ता ऋणपत्रमा आवेदन दिने अन्तिम दिन रहेको छ । जेठ ११ गतेदेखि बिक्री खुला भएको उक्त ऋणपत्रमा आज बैंकिङ समयसम्म आवेदन सकिने छ ।
कम्पनीले १० वर्षे अवधिको वार्षिक ८ दशमलव ५ प्रतिशत ब्याजदरकोे उक्त ऋणपत्र निष्कासन गरेको हो । ‘प्रभु बैंक डिबेञ्चर २०८७’ नामको उक्त ऋणपत्रको बिक्री प्रबन्धकमा मेगा क्यापिटल मार्केट लिमिटेड रहेको छ ।
कुल कित्तामध्ये कम्पनीले १६ लाख सामूहिक लगानीकोषसहित सर्वसाधारणमा बिक्री गर्नेछ भने २४ लाख कित्ता व्यक्तिगत तवरबाट विभिन्न व्यक्ति तथा संघ संस्थाहरुलाई बिक्री गर्नेछ ।
सर्वसाधारणका लागि छुट्याएको मध्येबाट २ हजार ५०० कित्ता ऋणपत्र सामूहिक लगानी कोषका लागि बाँडफाँड गरी बाँकी १५ लाख ९७ हजार ५०० कित्ता ऋणपत्र सार्वजनिक निष्कासन गर्न लागेको हो ।
प्रति ऋणपत्र १ हजार रुपैयाँ दरको ऋणपत्रमा न्यूनतम २५ कित्तादेखि अधिकतम १० लाख कित्तासम्म आवेदन दिन सकिनेछ ।
विक्री प्रबन्धकसँगै ऋणपत्र खरीदका लागि आस्बा सेवामा सहभागी सम्पूर्ण बैंक तथा वित्तीय संस्थाहरु र तीनका शाखा कार्यालयसँगै मेरो शेयर मार्फत पनि आवेदन दिन सकिनेछ ।
वि.सं.२०७८ जेठ २६ बुधवार १०:३२ मा प्रकाशित
