काठमाडौं । धितोपत्र बोर्डले कारबाही गर्न सिफारिस गरेको कम्पनीको सेयर मूल्यमा सकारात्मक सर्किट लागेको छ ।
समयमा नै वित्तीय विवरण प्रकाशित नगरेको भन्दै धितोपत्र बोर्डमा उजुरी परेको खानिखोला हाईड्रो पावरको सेयर कारोबार सुरु भएको केही समयमा नै १० प्रतिशतले मूल्य बढेको छ ।
बोर्डको निर्देशन पछि नेप्सेले कारोबार रोक्का गरेको थियो । नेप्सेले कारोबार रोक्का गरेपछि कम्पनीले वित्तीय विवरण सार्वजनिक गर्यो । वित्तीय विवरण अनुसार चालु आवको तेस्रो त्रैमाससम्ममा करिब १० करोड रुपैयाँ नोक्सानमा रहेको कम्पनीको प्रतिसेयर आम्दानी समेत करिब २२ रुपैयाँले ऋणात्मक रहेको विवरणमा उल्लेख छ ।
यस्तो कम्पनीको पनि सेयर कारोबारमा सकारात्मक सर्किट लागेको छ । कम्पनीले विवरण प्रकाशित गरेपछि नेप्सेले सोमबारबाट कारोबार फुकुवा गरेको थियो । कारोबार फुकुवा भएको पहिलो दिन नै सेयर मूल्यमा प्रति कित्ता २५ रुपैयाँले बढेर २७५ रुपैयाँ पुगेको छ ।
उक्त कम्पनीको कारोबारमा चलखेल भएको सेयर लगानीकर्ताहरुको गुनासो रहेको छ ।
वि.सं.२०७८ जेठ ३१ सोमवार १३:४५ मा प्रकाशित