काठमाडौं । नेपाल धितोपत्र बोर्डले चलखेल गरेर सेयर मूल्य बढाएका विभिन्न ५१ कम्पनीको नामावली प्रकाशित गरेको छ ।
बोर्डले सार्वजनिक गरेको कम्पनीहरुमध्ये हिमालयन डेस्टिलरी, शिवम सिमेन्ट, नागरिक लगानी कोष, विशाल बजार कम्पनी र साल्ट ट्रेडिङ कर्पोरेशन रहेका छन् ।
हिमालयन डेस्टिलरीको सेयर मूल्य गत वर्ष बैशाख ३० गते १ हजार २४२ रुपैयाँ रहेकोमा यो वर्षको जेठ ३१ गतेसम्म आइपुग्दा ५ हजार ४९५ रुपैयाँ पुगेको छ । कम्पनीको प्रतिसेयर आम्दानी १०३ रुपैयाँ ४ पैसा, प्रतिसेयर नेटवर्थ १८८ रुपैयाँ ५४ पैसा रहेको छ ।
बोर्डले शिवम सिमेन्टको पनि सेयर मूल्यमा चलखेल गरी अस्भाविक बढाइएको जनाएको छ । कम्पनीको सेयर मूल्य गत वर्षको वैशाख ३० गते ४७३ रुपैयाँ रहेकोमा यो वर्षको जेठ ३१ गतेसम्म आईपुग्दा १ हजार ५९२ पुगेको छ । कम्पनीको प्रतिसेयर आम्दानी ३३ रुपैयाँ ३ पैसा र प्रतिसेयर नेटवर्थ २१५ रुपैयाँ ३८ पैसा रहेको छ ।
यस्तै, नागरिक लगानी कोषको सेयर मूल्य गत जेठ ३१ गतेसम्म आईपुग्दा ४ हजार १०७ रुपैयाँ पुगेको छ । कम्पनीको सेयर मूल्य गत वर्षको बैशाख ३० गतेसम्म २ हजार ३६७ रुपैयाँ रहेको थियो । आर्थिक वर्ष २०७७/७८ को दोस्रो त्रैमासिक प्रतिवेदन बमोजिम कम्पनीको प्रतिसेयर आम्दानी २६ रुपैयाँ ३१ पैसा र प्रतिसेयर नेटवर्थ १५६ रुपैयाँ रहेको छ ।
त्यसैगरि बोर्ड विशाल बजार कम्पनीको सेयर मूल्यमा पनि चलखेल भएको जनाएको छ । कम्पनीको सेयर यो वर्षको जेठ ३१ गतेसम्म आईपुग्दा ६ हजार ४७७ रुपैयाँ पुगेको छ । जुन गत वर्षको वैशाख ३० गतेसम्म १ हजार ५२८ रुपैयाँ रहेको थियो । आर्थिक वर्ष २०७७/७८ को दोस्रो त्रैमासिक प्रतिवेदन बमोजिम कम्पनीको प्रतिसेयर आम्दानी २५० रुपैयाँ ३ पैसा र प्रतिसेयर नेटवर्थ १ हजार ६८५ रुपैयाँ ३२ पैसा रहेको छ ।
सेयर मूल्य चलखेल गरि बढाउने कम्पनीमध्ये साल्ट ट्रेडिङ कर्पोरेशन लिमिटेड पनि रहेको छ । कम्पनीको सेयर मूल्य गत वर्षको वैशाख ३० गतेसम्म २ हजार ४ सय रुपैयाँ थियो । तर, यो वर्षको जेठ ३१ गतेसम्म आईपुग्दा कम्पनीको सेयर मूल्य १० हजार ६६५ रुपैयाँ पुगेको छ । आर्थिक वर्ष २०७७/७८ को दोस्रो त्रैमासिक प्रतिवेदन बमोजिम कम्पनीको प्रतिसेयर आम्दानी २६ रुपैयाँ ३५ पैसा र प्रतिसेयर नेटवर्थ ४१४ रुपैयाँ ९ पैसा रहेको छ ।
बोर्डका अनुसार उक्त कम्पनीहरुको कारोबारमा भित्री कारोबार, सर्कुलर कारोबार, कर्नरिङ लगायतका धितोपत्र सम्बन्धी कसुरका सम्बन्धमा अध्ययन सुरु भएको बताइएको छ । पछिल्लो समय केही सूचीकृत कम्पनीको सेयर मूल्यमा चलखेल गरी बढाएपछि बोर्डले अनुसन्धान गरेको थियो ।
वि.सं.२०७८ असार १ मंगलवार १८:०१ मा प्रकाशित