काठमाडौं । बागमती प्रदेश सरकारले सडक तथा पुल पूर्वाधार विकास निर्माणलाई उच्च प्राथमिकतासाथ बजेट विनियोजन गरेको छ ।
बागमती प्रदेश सरकारको आर्थिक मामिला तथा योजना मन्त्री कैलाश प्रसाद ढुङ्गेलले मंगलबार प्रस्तुत गर्नुभएको बजेटमा प्रदेश गौरवका आयोजना र पूर्वाधार विकास निर्माणलाई प्राथमिकता दिएको बताउनुभयो ।
उहाँका अनुसार प्रदेश गौरवको आयोजनाको रुपमा रहेको पोष्ट बहादुर बागेटी (भीमफेदी–कुलेखानी) सुरुङ मार्गको निर्माण कार्य आगामी आर्थिक वर्षमा सुरु गरिने बताउनुभयो । जसका लागि संघीय सरकारको सहलगानीमा निर्माण गर्ने गरि ७५ करोड रुपैयाँ बजेट विनियोजन गरेको मन्त्री ढुङ्गेलले बताउनुभयो ।
प्रदेश सरकारले प्रादेशिक लोकमार्ग कार्यक्रममा पुष्पलाल चक्रपथ अन्तर्गतका सडकहरुलाई प्राथमिकतामा राखी कार्यान्वयन गरिने नीतिलाई निरन्तरता दिँदै प्रादेशिक सडक आयोजनाहरुलाई कार्यान्वयन गर्न १ अर्ब २९ करोड बजेट विनियोजन गरेको हो । प्रदेशको मुख्य आर्थिक त था बजार केन्द्र, धार्मिक, ऐतिहासिक, पर्यटकीय, औद्योगिक तथा अन्य स्थहरु जोड्ने रणनीतिक सडक वा उपमार्ग(बाइपास) जस्ता आयोजनाका लागि ३ अर्ब २५ करोड बजेट छुट्याइएको छ ।
प्रदेश सरकाले आगामी आर्थिक वर्षमा मदन भण्डारी मार्ग (भैसे–भिमफेदी–कुलेखानी–सिस्नेरी– दक्षिणकाली) को ५३ किलोमिटर मध्ये भैँसे–भीमफेदी ११.५० किलोमिटर सडक दुई लेनमा स्तारोन्नति गर्ने कार्य सम्पन्न गर्ने लक्ष्य लिएको छ ।
कुलेखानीदेखि दक्षिणकालीसम्मको सडक आगामी आवमा सम्पन्न गर्न र बाँकी २१ किलोमिटर सडकको दुई लेनमा स्तारोन्नतीका लागि आवश्यक बजेट विनियोजन गरेको मन्त्री ढुङ्गेलले जानकारी गराउनुभयो ।
यस्तै, शहरी तथा स्थानीय सडक कार्यक्रममा १ अर्ब ८७ करोड रुपैयाँ, प्रादेशिक सडक पुल कार्यक्रम अन्तर्गत आगामी आर्थिक वर्षमा सडक पुल तथा झोलुंगे पुल निर्माणका लागि १ अर्ब २८ करोड रुपैयाँ विनियोजन गरेको छ ।
साथै सडक सौन्दर्यीकरण तथा भुक्षय नियन्त्रणका लागि बायो ईन्जिनियरिङ्ग प्रविधि प्रयोग गरिने र सडकमा हुने सवारी तथा पदयात्री दुर्घटना न्युनीकरणका लागि सुरक्षा संरचाहरु निर्माण गर्न आवश्यक बजेटको व्यवस्था मिलाएको मन्त्री ढुङ्गेलले जानकारी गराउनुभयो ।
वि.सं.२०७८ असार २ बुधवार १२:३० मा प्रकाशित
