काठमाडौं । नियामक निकाय नेपाल धितोपत्र बोर्डले अस्वभाविक चलखेल गरि सेयर मूल्य बढाएको भनि सार्वजनिक गरेका ५१ वटा कम्पनीमा परेका दुई कम्पनीका लगानीकर्ताले भने बुधबारको कारोबारमा कमाएका छन् ।
यो दिनको कारोबारमा भारी गिरावट आउँदा र अन्य कम्पनीका लगानीकर्ताले गुमाउँदा पनि यी कम्पनीका लगानीकर्ताले भने कमाएका छन् । यो दिनको कारोबारलाई बोर्डले ५१ वटाको सूचिमा राखेपनि युनियन हाइड्रोपावर कम्पनी र महिला लघुवित्त वित्तीय संस्थाको कारोबारमा कुनै असर नपरेको देखिएको छ ।
चलखेल गरि सेयर मूल्य बढाएको भन्दै मंगलबार बोर्डले सार्वजनिक गरेको ५१ कम्पनीमध्ये युनियन हाइड्रोपावर कम्पनी र महिला लघुवित्त वित्तीय संस्था पनि रहेका छन् ।
बुधबारको कारोबारमा युनियन हाइड्रोपावर कम्पनीको सेयर मूल्य ७.६७ प्रतिशतले वृद्धि भएको छ भने महिला लघुवित्तको भने सामान्य वृद्धि भएको छ ।
यो दिन युनियन हाइड्रोपावरको सेयर मूल्य प्रतिकित्ता ३१ रुपैयाँले बढेर ४३५ पुगेको छ । अघिल्लो दिन कम्पनीको सेयर मूल्य ४०४ रुपैयाँ थियो । बुधवार कम्पनीको १५ करोड ९४ लाख ८२ हजार रुपैयाँ बराबरको ४ लाख ८ हजार ८२८ कित्ता सेयर खरिदबिक्री भएको नेप्सेले जनाएको छ ।
यस्तै, महिला लघुवित्तको सेयर मूल्य प्रतिकित्ता ५ रुपैयाँले बढेर ५०३५ रुपैयाँ पुगेको छ । अघिल्लो कारोबार दिन कम्पनीको सेयर ५ हजार ३० रुपैया थियो ।
बुधवार कम्पनीको ३ करोड ५६ लाख ५१ हजार रुपैयाँ बराबरको ७ हजार २३ कित्ता सेयर बिक्री भएको नेप्सेले जनाएको छ ।
मंलबार सेयर बजारको नियामक निकाय धितोपत्र बोर्डको अध्ययनले सेयर मूल्यमा अस्वभाविक चलखेल गरी मूल्य बढाइएका ५१ वटा कम्पनी सार्वजनिक गरेको थियो ।
बोर्डका अनुसार उक्त कम्पनीहरुको कारोबारमा भित्री कारोबार, सर्कुलर कारोबार, कर्नरिङ लगायतका धितोपत्र सम्बन्धी कसुरका सम्बन्धमा अध्ययन सुरु भएको जनाएको छ ।
वि.सं.२०७८ असार २ बुधवार १७:२० मा प्रकाशित