काठमाडौं । सरकार निर्माण क्षेत्र र अत्यावश्यक उद्योगलाई स्वास्थ्य मापदण्ड पालना गरी खोल्न दिने तयारीमा जुटेको छ । कोभिड–१९ व्यवस्थापन निर्देशक समितिको दोस्रो बैठकले यस्ता क्षेत्रलाई खोल्न दिने निर्णय गरेको हो ।
बैठकले गैर आवासीय नेपालीहरुबाट पठाइन लागेको अक्सिजन सिलिन्डर ल्याउनहवाई ढुवानी भाडा सरकारले उपलब्ध गराउने एवं इजरायल सरकारबाट सहयोग स्वरुप दिन लागिएको सघन उपचारमा प्रयोग हुने सामग्री स्वीकार गर्ने निर्णय पनि बैठकले गरेको छ । बैठकले सिसिएमसी केन्द्रको प्रशासनिक कार्यका लागि बजेट आवश्यक भएको भन्दै त्यसको पनि व्यवस्थापन गर्ने निर्णय गरेको छ ।
बैठकमा निर्देशन दिँदै प्रधानमन्त्री एवं समितिका अध्यक्ष केपी शर्मा ओलीको स्वास्थ्य मापदण्डमा कडाइ गर्दै लकडाउनलाई सक्रमणको जोखिम नहुने हदसम्ममात्र खुकुलो गर्न सकिने बताउनुभयो ।
कोभिड नियन्त्रणका लागि सबै भन्दा महत्वपूर्ण र अनिवार्य तत्व खोप नै भएको उल्लेख गर्दै उहाँले त्यसका लागि ४० लाख डोज खोप ल्याउन गृहकार्य भइ रहेको र साउनदेखि लगाउन थालिने बताउनु भयो । त्यसबाहेक अन्य देशसँग पहल÷प्रयत्न भइरहेकोले खोपको अभाव क्रमशःहलहुँदै जाने उहाँले बताउनुभयो ।
बैठकले संक्रमणको जोखिम रोक्ने र अत्यावश्यक वस्तु उत्पादन र आपूर्ति सहित‘स्मार्ट लक डाउन’तर्फ जाने निर्णय गरेको छ । अबको साता जारी लकडाउन कायम राख्दै त्यसपछिको अवस्था मुल्यांकन गर्ने र स्वास्थ्य मापदण्ड कडाइका साथ पालना गराइ केही क्षेत्र खुल्ला गरिनुपर्ने निश्कर्ष समितिले निकालेको छ ।
बैठकले नेपाली श्रमिक अधिक संख्यामा रहेका टर्की, कतार, साउदी अरेबिया, युएई, जापान र मलेसियाजस्ता देशहरुमा हवाई उडानपुनः संचालनगर्ने निर्णय गरेको छ । यि देशहरुबाट सातामा दुई हजार जना यात्रु भन्दा नबढने गरी हवाई उडान सञ्चालन हुने छन् ।
बैठकले वैदेशिक रोजगारीमा गएका तर विभिन्न कारणले होटलमा क्वारेन्टाइनमा बस्न नसक्ने कामदारका लागि सहयोग रकम उपलब्ध गराउने निर्णय समेत गरेको छ । कुल १५ दिन बस्नुपर्ने क्वारेन्टाइनका लागि १० दिनसम्मको खर्च सरकारले व्यवस्थापन गर्नेछ ।
वि.सं.२०७८ असार ३ बिहीवार ०६:२२ मा प्रकाशित
