काठमाडौं । सोमबार नारायणी डेभलपमेन्ट बैंकको सेयर मूल्यमा उछाल आएको छ । बैंकको सेयर मूल्य आज ९.९७ प्रतिशतले वृद्धि भएको हो ।
प्रतिकित्ता ६५ रुपैयाँले वृद्धि भई बैंकको सेयर मूल्य ७१७ रुपैयाँ पुगेको छ । बैंकले नियामक निकाय नेपाल धितोपत्र बोर्डमा शत प्रतिशत हकप्रद सेयर निष्काशन गर्नका लागि निवेदन दिएसंगै लगानीकर्ताको आकर्षण बढेको हो ।
बैंकको आज २ करोड ९२ लाख २५ हजार रुपैयाँ बराबरको सेयर कारोबार भएको छ । उक्त दिन बैंकको ४२ हजार ३६२ कित्ता सेयर खरिदबिक्री भएको नेप्सेले जनाएको छ ।
बैंकले १ः१ को अनुपार हकप्रद सेयर जारी गर्नका लागि नियामक निकाय नेपाल धितोपत्र बोर्डमा निवेदन दिएको छ । बैंकले ९९ करोड १४ लाख २९ हजार ८६७.४२ रुपैयाँ बराबरको उक्त सेयर निष्काशनका लागि असार ४ गते बोर्डमा निवेदन दिएको हो ।
बोर्डको स्वीकृतिपछि बैंकले ९९ लाख १४ हजार २९८.६७ कित्ता हकप्रद सेयर निष्काशन गर्नेछ । सेयर निष्काशन तथा बिक्री प्रबन्धकमा ग्लोबल आइएई क्यापिटल रहेको छ ।
यो कम्पनी नेपाल धितोपत्र बोर्डले इन्साइडर ट्रेडिङ , कर्नरिङ गरेर अस्वभाविक रुपमा सेयर मूल्य बढाएको भनेर सार्वजनिक गरेका ५१ वटा कम्पनीमा परेको छ ।
वि.सं.२०७८ असार ७ सोमवार १५:१६ मा प्रकाशित