काठमाडौँ । माथिल्लो तामाकोशी जलविद्युत् आयोजनाबाट उत्पादित बिजुली राष्ट्रिय प्रणालीमा जोड्नका लागि परीक्षण सुरु भएको छ ।
आयोजनाका अनुसार आज (असार १३ गतेदेखि) १९ गतेसम्म विद्युतको परीक्षण हुने छ । आयोजनाले त्यसको लागि लाइन व्यवस्थापनको काम भइरहेको छ ।
यो युनिटको परीक्षण सक्ने र राष्ट्रिय प्रणालीमा बिजुली जोडिने छ । ४५६ मेगावाट क्षमताको आयोजनाबाट उत्पादन भएको विद्युत खिम्ती–लामोसाँधु प्रशारण लाइनमा जोडिने छ ।
नेपाल विद्युत प्राधिकरणका अनुसार पनि माथिल्लो तामाकोशीको विद्युत राष्ट्रिय विद्युत प्रणालीमा जोड्ने भएकोले खिम्ती लामोसाँघु १३२ केभी प्रसारण लाइन बन्द हुने भएको छ ।
जसले गर्दा ढल्केबरदेखि कोहरपुरसम्मका सबस्टेशनबाट विद्युत आपूर्ति हुने क्षेत्रका औद्योगिक ग्राहकको छोटा समयका लागि विद्युत् कटौती हुने छ । प्राधिकरणले कुलेखानी जलाशयको पानी प्रयोग गरी विद्युत कटौतीको समय कम गर्ने प्रयास गरिने जनाएको छ ।
माथिल्लो तामाकोशी आयोजना सुरु भएको करिब १० वर्ष पछि प्रशारण लाइनमा जोडिन लागेको हो । सुरुमा ३५ अर्ब लागत रहने अनुमान गरेपनि अहिले करिब ८० अर्ब रुपैयाँ पुगेको छ । आयोजना निर्माणमा भूकम्प, भारतले गरेको नाकाबन्दी, कोरोना, अमेरिकी डलर बढनुलाई देखाइएको छ ।
वि.सं.२०७८ असार १३ आइतवार १०:४० मा प्रकाशित
