काठमाडौं । विश्वव्यापी रुपमा फैलिएको कोरोना महामरीका कारण सरकारले जारी गरेको निषेधाज्ञामा पनि सुनको आयातमा कमी आएको छैन । चालु आर्थिक वर्षको ११ महिनामा २१ अर्ब बढीको सुन आयात भएको छ ।
भन्सार विभागका अनुसार जेठ मसान्तसम्म २१ अर्ब ६ करोड ८३ लाख ७८ हजार रुपैयाँको सुन आयात हो । नेपालमा टर्की र सयुक्त अरब इमिरेट (यूएई) बाट सुन आयात हुने गरेको छ । जेठ मसान्तसम्म ३ हजार १८ केजी सुन नेपाल भित्रिएको विभागले जनाएको छ । जसमा सबैभन्दा बढी यूएईबाट आयात भएको छ ।
चालु आवको ११ महिनाको अवधिमा यूएइबाट मात्रै १८ अर्ब ९४ लाख ६१ लाख ७३ हजार रुपैयाँको २ हजार ७१८ केजी सुन यूएईबाट आयात भएको विभागको तथ्याङकमा उल्लेख छ ।
यस्तै, टर्कीबाट भने जेठ मसान्तसम्म २ अर्ब १२ करोड २२ लाख ४ हजार रुपैयाँ ३ सय केजी सुन नेपाल भित्रिएको विभागले जनाएको छ । चालु आवको ११ महिनाको अवधिमा सरकारले सुन आयातबाट २ अर्ब ५६ करोड ५३ लाख ४ हजार रुपैयाँ राजस्व प्राप्त गरेको विभागले जनाएको छ ।
वि.सं.२०७८ असार १३ आइतवार १२:११ मा प्रकाशित