काठमाडौं । सञ्चालनमा रहेका जीवन, निर्जीवन तथा पुनर्बीमा कम्पनीले चालु आर्थिक वर्षको तेस्रो त्रैमाससम्ममा ४ खर्ब ६ अर्ब ८४ करोड १० लाख २८ हजार रुपैयाँ लगानी गरेका छन् ।
उक्त लगानीमध्ये यी कम्पनीहरुले ‘क’, ‘ख’ र ‘ग’ वर्गका बैंकको मुद्दती खातामा ३ खर्ब २७ अर्ब ७७ करोड ८१ लाख ९९ हजार रुपैयाँ लगानी गरेर ब्याज खाइरहेका छन् । बीमा समितिका अनुसार निर्जीबन तथा पुनर्बीमा कम्पनीको मात्रै बैंकमा ५० अर्ब ७२ करोड २३ लाख ९५ हजार रुपैयाँ मुद्दति निक्षेपमा रहेको छ ।
जसमा ४५ अर्ब ३५ करोड ८७ लाख २५ हजार रुपैयाँ ‘क’ वर्गका बैंकको मुद्दती खातामा रहेको छ भने ‘ख’ वर्गका बैंक तथा वित्तीय संस्थाको मुद्दती निक्षेपमा ४ अर्ब ६० करोड ११ लाख २० हजार रुपैयाँ र ‘ग’ वर्गका बैंक तथा वित्तीय संस्थाको मुद्दती निक्षेपमा ७६ करोड २५ लाख ५० हजार रुपैयाँ रहेको छ ।
यस्तै जीवन बीमा कम्पनीले गरेको लगानीमा ‘क’, ‘ख’ र ‘ग’ वर्गका बैंकको मुद्दति खातामा २ खर्ब ७७ अर्ब ५ करोड ५८ लाख ४ हजार रुपैयाँ लगानी गरेर ब्याज खाइरहेका छन् । जसमा ‘क’ वर्गका वाणिज्य बैकको मुद्दति निक्षेपमा २ खर्ब ४५ अर्ब ४७ करोड ५० लाख ४ हजार रुपैयाँ रहेको छ ।
ख’ वर्गका बैंक तथा वित्तीय संस्थाको मुद्दती निक्षेपमा २८ अर्ब ३८ करोड १३ लाख रुपैयाँ रहेको छ भने ‘ग’ वर्गका बैंक तथा वित्तीय संस्थाको मुद्दति निक्षेपमा ३ अर्ब १९ करोड ९५ लाख रुपैयाँ रहेको छ ।
बीमा समितिले आईपीओमा जम्मा लगानीको १० प्रतिशत मात्रै लगानी गर्न भनेको छ । समितिले सरकारको बचतपत्र तथा ऋणपत्रमा न्यूनतम ५ प्रतिशत, वाणिज्य बैंकको मुद्दछित निक्षेप र पूर्वाधार बैंकको मुद्दती निक्षेपमा ४० प्रतिशत, घर जग्गामा बढीमा ५ प्रतिशत, ‘क’, ‘ख’ र ‘ग’ वर्गका बैंक तथा वित्तीय संस्थाको अग्राधिकार सेयर र ऋणपत्रमा बढीमा २० प्रतिशत लगानी गर्ने व्यवस्था गरेको छ ।
यस्तै पब्लिक कम्पनीको ऋणपत्रमा बढीमा २० प्रतिशत, कृषि, पर्यटन र जलस्रोतमा बढीमा २० प्रतिशत, म्यूचुअल फण्ड र नागरिक लगानी कोषमा बढीमा ५ प्रतिशत, विकास बैैंक तथा वित्तीय संस्थाको मुद्दतिमा बढीमा २० प्रतिशत ‘ग’ वर्गका बैंक तथा वित्तीय संस्थाको मुद्दतिमा बढीमा १० प्रतिशत लगानी गर्न भनेको छ ।
वि.सं.२०७८ असार १३ आइतवार १८:४७ मा प्रकाशित
