काठमाडौं । चालु आर्थिक वर्षको ११ महिनामा ५ अर्ब ८८ करोड बढीको चाँदी आयात भएको छ । भन्सार विभागका अनुसार चालु आवको जेठ मसान्तसम्ममा ५ अर्ब ८८ करोड ३९ लाख ८० हजार रुपैयाँ बराबरको चाँदी आयात भएको हो ।
चाँदी संयुक्त अरब इमिरेट्स (यूएई), चीन, हङकङ, भारत र अमेरिकाबाट नेपालमा आयात हुने गरेको छ । जेठ मसान्तसम्म सबैभन्दा बढी यूएईबाट आयात भएको विभागले जनाएको छ ।
उक्त अवधिमा यूएईबाट मात्रै ३ अर्ब ५३ करोड ९३ लाख ८ हजार रुपैयाँ बराबरको ३६ हजार केजी चाँदी आयात भएको छ ।
यस्तै, हङकङबाट १ अर्ब २२ करोड ५० लाख १६ हजार रुपैयाँ, चीनबाट १ अर्ब ११ करोड ८८ लाख २४ हजार, भारतबाट ६ लाख ७७ हजार र अमेरिकाबाट १ लाख ६५ हजार रुपैयाँ बराबरको चाँदी नेपाल भित्रिएको विभागले जनाएको छ । ११ महिनाको अवधिमा चाँदी आयातबाट सरकारलाई ५० करोड १३ लाख ८६ हजार रुपैयाँ राजस्व प्राप्त भएको छ ।
यो अवधिमा आयात मात्रै होइन् चाँदीका गहना निर्यात समेत भएको विभागले जनाएको छ । भन्सार विभागका अनुसार चालु आवको ११ महिनाको अवधिमा नेपालबाट २० करोड ६२ लाख ५२ हजार रुपैयाँको चाँदीका तयारी गहना निर्यात भएको छ ।
यो अवधिमा विशेषगरी विदेशी मुलुकमा बन्न नसक्ने नेपाली मौलिक गरगहना नेपालबाट निर्यात भएको छ । विभागका अनुसार नेपालीहरु बढी बसोवास बढी भएका मुलुकहरुमा चाँदीका गरगहना निर्यात भएका छन् ।
चालु आवको ११ महिनाको अवधिमा नेपालबाट विश्वका विभिन्न १५ मुलुकमा चाँदीका गहना निर्यात भएको छ । जेठ मसान्तसम्म सबैभन्दा बढी अमेरिकामा १४ करोड ३१ लाख ४६ हजार रुपैयाँ बराबरको चाँदीका गहना निर्यात भएको देखिएको छ ।
यस्तै, जापानमा १ करोड ४४ लाख ३२ हजार, अष्ट्रेलियमा १ करोड ३४ लाख ५२ हजार रुपैयाँ बराबरका चाँदीका गहना निर्यात भएको छ ।
यी मुलकुसहित बेल्जियम, क्यानडा, फ्रान्स, जर्मनी, हङकङ, नेदरल्याण्ड पोर्चुगल, सिंगापुर, स्वीट्जरल्याण्ड, टाइवान लगायतका देशहरुमा चाँदीका मौलिक गहनाहरु निर्यात भएको विभागले जनाएको छ ।
वि.सं.२०७८ असार १४ सोमवार १६:४८ मा प्रकाशित