काठमाडौं । नेपाल धितोपत्र बोर्डले ‘वस्तु विनिमय बजार सञ्चालन गर्ने अनुमति पत्र प्रदान गर्ने नीतिगत एवं प्रक्रियागत व्यवस्था सम्बन्धी निर्देशिका-२०७८ लागु गरेको छ । बोर्डले बस्तु विनियम बजार सञ्चालनको लागि निर्देशिका लागु गरेसँगै अब वस्तु विनिमय बजार सञ्चालनको लागि बाटो खुला भएको छ ।
निर्देशिकाको प्रस्तावनामा नेपालमा वस्तु विनिमय बजार सम्बन्धी प्रचलित कानुन बमोजिम वस्तु विनिमय बजार सञ्ंचालन गर्ने कम्पनी स्थापना गर्न बोर्डबाट पूर्व स्वीकृति, अनुमतिपत्र तथा सञ्चालन स्वीकृति प्रदान गर्ने प्रकृयालाई व्यवस्थित, पारदर्शी एवं विश्वसनीय बनाउन आवश्यक भएकाले नेपाल धितोपत्र बोर्डले वस्तु विनिमय बजार सम्बन्धी ऐन, २०७४ को दफा ६३ को खण्ड (ख) को व्यवस्था बमोजिम यो ‘वस्तु विनिमय बजार सञ्चालन गर्न अनुमतिपत्र प्रदान गर्ने नीतिगत एवं प्रकृयागत व्यवस्था सम्बन्धी निर्देशिका’ बनाई लागू गरेको छ भन्ने उल्लेख रहेको छ ।
निर्देशिकामा न्यूनतम चुक्ता पूँजी १ अर्ब ५० करोड र अधिकतम २ अर्ब रुपैयाँ हुनुपर्ने उल्लेख छ । १ अर्ब ५० करोड रुपैयाँ पुँजी हुने संस्थाले वस्तुविनिमय बजार सम्बन्धी नियमावली,२०७४ को अनुसूची–१३ को खण्ड (क), (ङ), र (च) मा तोकिएका वस्तुहरु र २ अर्ब पुँजी भएका संस्थाले वस्तुविनिमय बजार सम्बन्धी नियमावली,२०७४ को अनुसूची–१३ को खण्ड (क), (ख), (ग), (घ), (ङ), र (च) मा तोकिएका वस्तुहरुको कारोबार गर्न पाउने छन् ।
वस्तु विनिमय बजार सञ्चालन गर्ने संस्थाको संस्थापकहरुले कम्तीमा ५१ प्रतिशत र बढीमा सत प्रतिशत सेयर लगानी गर्ने प्रस्ताव गरी निवेदन दिनु पर्नेछ । प्रस्तावित संस्थामा विदेशी रणनीतिक साझेदार संस्थाले कुल चुक्ता पुँजीको बढीमा ५१ प्रतिशतसम्म सेयर लगानी गर्न सक्नेछन् । यो सँगै विदेशी रणनीतिक साझेदार संस्था भित्र्याउन बाटो खुला भएको छ ।
निर्देशिका पढ्नका लागि यहाँ क्लिक गर्नुहोस् ।
वि.सं.२०७८ असार १५ मंगलवार १५:४६ मा प्रकाशित