काठमाडौं । नेपाल धितोपत्र बोर्डले सेयर बजारमा गैरआवासीय नेपाली (एनआरएनए) लाई भित्र्याउन गरेको अध्ययन सकेर अर्थ मन्त्रालयसँग छलफल गर्ने तयारीमा जुटेको छ ।
बोर्डका अध्यक्ष भिष्मराज ढुंगानाका अनुसार सेयर बजारमा गैरआवासीय नेपालीलाई भित्र्याउनका लागि विज्ञले गरेको अध्ययनको प्रतिवेदन तयार भएपछि त्यसको विषयमा अर्थ मन्त्रालयमा छलफलको तयारी भएको छ । विज्ञले गरेको अध्ययनले दिएको सुझावको आधारमा मन्त्रालयमा छलफल हुने अध्यक्ष ढुंगानाको भनाई छ ।
अध्यक्ष ढुंगानाका अनुसार सम्भवत आगामी साता अर्थ मन्त्रालयमा छलफल हुनेछ । त्यसको आधारमा गैर आवासीय नेपालीलाई पुँजी बजारमा भित्र्याउने विषय टुंगोमा पुग्ने छ ।
धितोपत्र बोर्डले विगत लामो समयदेखि आफ्नो नीति तथा कार्यक्रममा सेयर बजारमा गैरआवासीय नेपालीलाई भित्र्याउने बुँदा राख्दै आएको छ । तर अहिलेसम्म कार्यान्वयनमा आएको थिएन । अब भने गैह्र आवासीय नेपालीलाई पुँजी बजारमा भित्र्याउने विषयले पुर्णता पाउने सम्भावना नजिक पुगेको उहाँको भनाई छ । उहाँका अनुसार आगामी आवबाट यो कामले पुर्णता पाउने भएको छ ।
बोर्डले लामो समयदेखि गैरआवासीय नेपालीलाई सेयर बजारमा भित्रयाउने भन्दै आएपनि लगानीको मोडल, लगानीकर्ताले लैजाने प्रतिफल तथा विभिन्न कानूनी जटिलताहरुले पुर्णता पाउन सकेको थिएन ।
बोर्डको अध्ययनले यी सबै अस्पष्टताको न्यूनिकरण गरेको बताइएको छ । लामो समयदेखि लगानीकर्ता तथा जानकारहरुले कानूनी अडचन नफुकाइ गैरआवासीय नेपाली सेयर बजारमा आएर लगानीगर्न सक्ने सम्भावना नरहेको बताइन्छ ।
वि.सं.२०७८ असार १६ बुधवार १७:३३ मा प्रकाशित