काठमाडौं । नागरिक लगानी कोषका संचालक समितिका अध्यक्ष प्रा.डा रामचन्द्र भट्टराईले वित्तीय तथा पुँजी बजारमा कोषले नेतृत्वदायी भुमिका खेल्न सक्ने सम्भावना रहेको बताउनुभएको छ ।
शुक्रबार सम्पन्न कोषको २६ औं वार्षिक साधारणभामा प्रा.डा भट्टराईले यस्तो जानकारी गराउनुभएको हो । उहाँले कोषसँग पुँजी व्यवस्थापनको लामो अनुभव तथा सर्वसाधारणको अगाध विश्वास र भरोसा रहेको हुँदा सार्वजनिक संस्थान तथा अन्य निकायहरुको पेन्सन कोष जस्ता कार्यक्रम संचालन गर्न सकिने सम्भावना रहेको पनि जानकारी गराउनुभयो ।
“कोषले संचालन गरिरहेका अवकाश कोष कार्यक्रमका सहभागीहरु विशेष गरी सरकारी, गैर सरकारी एवं नीजि प्रतिष्ठानमा कार्यरत कर्मचारी मात्र रहेको हुँदा कोषद्वारा नसमेटिएका अन्य क्षेत्रका नेपाली नागरिकहरुलाई पनि सामाजिक सुरक्षाको प्रत्याभूति सहितको बचत कार्यक्रमले समेट्न सकिने सम्भावना रहेको छ ।”– प्रा.डा भट्टराईले भन्नुभयो ।
साथै कोषले संकलन गरेको बचत रकमलाई राष्ट्रिय गौरवका आयोजनाहरुमा लगानी गरी “समृद्ध नेपाल सुखी नेपाली”को परिकल्पना पूरा गर्ने एवम् लगानी विविधीकरण गरी प्रतिफलको अभिवृद्धि गर्न सकिने अवसरहरु रहेको उहाँको भनाई छ ।
सोही अवसरमा कोषको कारोबार विस्तार गर्न स्वरोजगार र वैदेशिक रोजगारमा रहेका नागरिकलाई आबद्ध गराउने उद्वेश्यले नागरिक पेन्सन योजना कार्यक्रम शुरु गरिएको साथै देशको पुँजीबजारको विकास, विस्तार र स्थायित्व प्रदान गर्ने उद्वेश्यले कोषको अग्रसरतामा नागरिक स्टक डिलर कम्पनी स्थापना गरी कारोबार शुरु भएको जानकारी गराउनुभयो ।
“कोषद्वारा संचालित सम्पूर्ण कार्यक्रमहरुमा एनएलके वेव वेस्ड सफ्टवेर पूर्ण रुपमा लागू गरिएको छ । साथै नेपाल सरकारको ऋन्ब्क् सफ्टवेयरमा म्बतब आदान प्रदान गर्ने कार्य सम्पन्न भएको छ । नयाँ सफ्टवेयरको प्रयोगको लागि आवश्यक उपकरणहरु खरिद गरी कोषको प्रणालीमा जडान गरिसकिएको छ ।”– प्रा.डा भट्टराईले भन्नुभयो ।
कोषमा विद्यमान उपरोक्त सम्भावना तथा अवसरको उपयोग गर्दै समस्या एवम् चुनौतीहरुलाई समाधान गरी लगानीको विविधीकरण गर्दै उत्पादनशील क्षेत्रमा लगानी गरी कोषलाई नाफामुलक बनाउन प्रयास गरिने उहाँको भनाई छ ।
शुक्रबार सम्पन्न कोषको २६ औं वार्षिक साधारणभाले आर्थिक बर्ष २०७६/७७ को आम्दानी बाँडफाँड हिसाव बिवरणमा छुट्याएको प्रस्तावित ९ प्रतिशत बोनस सेयर र ८ दशमलव ८९४७ प्रतिशत नगद लाभांश पारित गरेको छ ।
चालु आर्थिक बर्षको जेठ मसान्तसम्ममा कोषले १ खर्व ७२ अर्ब रुपैयाँ रकम संकलन र १ खर्व ७१ अर्ब ९७ करोड रुपैयाँ लगानी गरेको छ ।
यस आवमा कोषको पूँजी बृद्धि हुनका साथै कारोबार विस्तार भई विगत देखि संचालन हुँदै आएका कोषहरु, हिसाब योजना तथा पुँजी बजार सम्बन्धी सेवा समेत निरन्तर रुपमा सञ्चालन भईरहेका छन् ।
कोषको आर्थिक वर्ष २०७६/७७ को करपछिको खुद नाफा ६१ करोड ९६ लाख ७० हजार रहेको छ । खुद नाफा मध्ये बाँडफाँड योग्य रकम ५५ करोड ३६ लाख ७२ हजार रहेको छ ।
वि.सं.२०७८ असार १८ शुक्रवार १८:२२ मा प्रकाशित
