काठमाडौं । नेपाल बैंकर्स संघले आर्थिक वर्ष २०७८-७९ को मौद्रिक नीतिका लागी नेपाल राष्ट्र बैंकलाई सुझाव दिएको छ ।
सुझावका क्रममा वाणिज्य बैंकका सहायक कम्पनीलाई धितोपत्र ब्रोकरको लाइसेन्स दिन पलह गरिदिन आग्रह गरिएको छ ।
सुझावमा राष्ट्र बैंकले तोकेको व्यवस्था अनुसार केही बैंकहरुले सहायक कम्पनीहरु समेत खोली सकेका छन् । सहायक कम्पनीहरुले देशका कुना कुनामा छरिएका वाणिज्य बैंकहरुका शाखा मार्फत् ग्रामिण क्षेत्रमा पनि पुँजी बजारलाई विस्तार गर्न सक्ने सुझावमा उल्लेख छ ।
वाणिज्य बैंकका सहायक कम्पनीले हाल नियमानुसार निवेदन दिएर पनि ब्रोकर लाइसेन्स पाउन नसकेको भन्दै यसका लागी राष्ट्र बैंकबाट पहल भएमा वित्त बजारलाई सहयोग पुग्ने संघको सुझाव रहेको छ ।
सुझावमा बैंक तथा वित्तीय संस्थाहरुले धितोपत्र बजारमा खरिद गरेको एक वर्ष व्यतीत भएका सेयर वा डिबेञ्चर लगानी मध्येबाट एक आर्थिक वर्षमा प्राथमिक पुँजीको १ प्रतिशत रकमसम्मको लगानी मात्र बिक्री गर्न पाउने विद्यमान व्यवस्थाबाट कुनै निश्चित कम्पनीको वित्तीय अवस्थाका कारण सो कम्पनीको सेयर वा डिबेञ्चरमा गरेको लगानीबाट भविष्यमा उचित प्रतिफल प्राप्त हुन नसक्ने अवस्थामा लगानी बिक्री नगरी बैंककै स्वमित्वमा राखिरहनु पर्ने अवस्था सिर्जना हुने हुँदा खरिद गरेको एक वर्ष व्यतीत भएका (अल्पकालिन बाहेक) सेयर वा डिबेञ्चर बिना बन्देज बिक्री गर्न पाउने व्यवस्था गर्ने रहेको छ ।
यस्तै विपन्न वर्ग कर्जामा गणना गर्ने प्रयोजनका लागी लगानी गरिएको “घ” वर्गको वित्तीय संस्थाको संस्थापक सेयर तोकिएको प्रक्रिया बमोजिम नियामक निकायको स्वीकृति पश्चात् साधारण सेयरमा परिणत भएमा उपरोक्त साधारण सेयर बराबरको लगानी बिक्री÷विनिवेश गर्नु पर्ने व्यवस्थालाई ऐच्छिक बनाउने सुझावमा उल्लेख छ ।
वि.सं.२०७८ असार २० आइतवार १७:५१ मा प्रकाशित
