काठमाडौं । सेयर बजारका दोहोरो अंकको गिरावट देखिएको छ । आर्थिक वर्ष सकिन लागेको र मौद्रिक नीति निर्माणको क्रममा रहेकोले गर्दा लगानीकर्ता पर्ख र हेरको अवस्थामा हुँदा बजारमा गिरावट आउनुका साथै कारोबार रकम पनि निकै घटेको छ ।
सरकारले पनि असार २५ गतेसम्म कर तिर्नु भनेर समय नै तोकेको छ । त्यसले गर्दा पनि बजारको कारोबार रकमको लागि दबाब परेको छ । अहिले कोरोनाका कारण अर्थतन्त्रमा असर परेको र यही बेला सरकारले कर तिर्नको लागि समय नै निर्धारण गरेपछि त्यसको असर बजारमा देखिएको जानकारको भनाई छ ।
यस्तै नेपाल राष्ट्र बैंकले आगामी आवको लागि मौद्रिक नीति निर्माण गरिरहेको र त्यसमा बजारलाई च्याप्ने केही नीति ल्याउन लागेको भन्ने चर्चाका कारण पनि बजार प्रभाव देखिएको जानकारहरुको भनाई छ । यति बेला लगानीकर्ता असार मसान्तको चपेटा र मौद्रिक नीतिमा पर्ख र हेराइमा रहेका छन ।
सोमबार बजार मापन गर्ने सूचक ११.७८ अंकले घटेर परिसूचक २८२२.७४ बिन्दुमा रोकिएको छ । २२४ कम्पनीको १ करोड ६३ हजार ६३६ कित्ता सेयर ४ अर्ब ५८ करोड २२ लाख १२ हजार ५७९ रुपैयाँको सेयर कारोबार भएको छ ।
कारोबारमा अधिकांश समूहको उपसूचकमा गिरावट आएको छ । बैंकिङ समूहको ७.०२, विकास बैंक १०२.४२, जलविद्युत ५३.६९, वित्त कम्पनी ५७.०६, माइक्रोफाइनान्स ३४.१८, जीवन बीमा समूहको उपसूचक १३६.२२ अंकले घटेको छ ।
वि.सं.२०७८ असार २१ सोमवार १५:१५ मा प्रकाशित
