काठमाडौं । नेपाल राष्ट्र बैंक पूर्व कार्यकारी निर्देशक नरबहादुर थापाले अहिले बोर्ड बैंकका सहायक कम्पनीलाई ब्रोकर लाइसेन्स दिने विषयमा चौबाटोमा अलमलिएको बताउनु भएकोछ ।
धितोपत्र बोर्डले आगामी आर्थिक वर्षको नीति तथा कार्यक्रमका लागि आयोजना गरेको सुझाव संकलन कार्यक्रममा थापाले यस्तो बताउनुभएको हो ।
बैंकका सहायक कम्पनीलाई ब्रोकर लाइसेन्स दिएर सेयर बजारलाई दिगो बनाउनुपर्नेमा उहाँले जोड दिनुभयो । थापाले वित्तीय क्षेत्र विकास रणनीतिको रिभ्यू नभएकाले सेबोन यसका लागि पनि स्पष्ट हुनुपर्ने धारणा राख्नुभयो ।
थापाले अहिले बजारमा देखिएका समस्याहरु र क्यापिटल मार्केटको सुधार र विकासको लागि सरोकारवाला निकायहरुले के भनिरहेका छन् ? यसलाई आधार मानेर काम कारबाही अगाडि बढाउनुपर्नेमा जोडदिनुभयो ।
पुँजी बजारको विकास भएपनि अन्तर्राष्ट्रिय बजारसँग नजोडिएको भन्दै बोर्डले यसमा पहल कदमी लिनुपर्ने सुझाव दिनुभयो । बजारको विकास भएपनि राष्ट्रिय तथा स्थानीय अर्थतन्त्रसँग जोडिन नसकेको अवस्था बोर्ड पथ प्रर्दशक बन्नुपर्ने थापाको भनाई छ ।
उहाँले ग्लोबल अर्थतन्त्रमा नेपालको पुँजीबजार पनि जोडिनुपर्छ भन्दै अल्टरनेटिभ फण्डमा फोकस, प्रविधिमा थप सुधार, क्यापिटलको मार्केटको विविधिकरण लगायतलाई बोर्डले आत्मसाथ गर्दै सेयर बजार दिगो बनाउने नीति निर्माण गर्न सुझाव दिनुभयो । त्यसका लागि सरकार, राष्ट्र बैंकसँग समन्वय गर्नुपर्नेमा जोड दिनुभयो ।
कार्यक्रममा सेयर बजारको जानकार केशव श्रेष्ठले बोर्डले अन्य काममा भन्दा पनि नियमनलाई प्राथमिकतामा राख्नुपर्ने बताउनुभयो ।
सेयर बजारम अहिले करिब ३७ लाख ग्राहक रहेको र उनीहरुलाई बजारबाट फर्कन नदिन बोर्डले अभिभावकीय भूमिका निर्वाह गर्नुपर्ने बताउनुभयो ।
पछिल्लो समयमा बोर्डले राम्रो काम गरेपनि सन्तोष गर्ने ठाँउ भने नरहेको उहाँको दाबी छ । अझै पनि टिएमएसमा समस्या रहेको भन्दै यो समस्या तत्काल समाधानको लागि बोर्डले पहल गर्नुपर्ने धारणा राख्नुभयो ।
कार्यक्रममा सेयर बजारका अर्को जानकार मुक्ती अर्यालले पुँजीबजारलाई पुँजीबजार जसरी नै चल्न दिनुपर्ने धारणा राख्नुभयो । उहाँले बजारमा ओपन इन्ट्रि र एक्जिटको व्यवस्था आवश्यक रहेको तर्क गर्नुभयो । उहाँले बजारलाई नियन्त्रण भन्दा पनि नियमन गर्न आवश्यक रहेको धारणा राख्नुभयो ।
वि.सं.२०७८ असार २५ शुक्रवार १८:१४ मा प्रकाशित