काठमाडौं । आन्तरिक राजस्व विभागले ६६ करोड ८६ लाख ७३ हजार ४३८ रुपैयाँ कर छलिगर्ने ३ जना विरुद्ध उच्च अदालत पाटनमा मुद्दा दर्ता गरेको छ ।
विभागका अनुसार झुट्टा तथा नक्कली मूल्य अभिवृद्धि कर विजक जारी गरी राजस्व छलि गर्ने सर्लाही जिल्ला, ब्रम्हपुरी-७ बस्ने मनिराज सप्लायर्सका प्रोप्राईटर राज देवी तथा उक्त फर्मको मुख्य कारोबार गर्ने व्यक्ति राजाराम महतो र रौतहट जिल्ला, तेजपाकड-५ शिव ट्रेडर्सका प्रोपाइटर तथा अल्का सप्लायर्सका ओमप्रकाश सिंह भुमिहार विरुद्ध मुद्दा दता भएको हो ।
विभागले महताबोट ४१ करोड ५१ लाख ३१ हजार ८५४ रुपैयाँ विगो असुल गरी जरिवाना र कैद मागदावी लिई उच्च अदालत पाटनमा मुद्दा दर्ता गरेको जनाएको छ ।
महतोले मालबस्तु स्थानीय खरिद तथा आयात नगरी, झुट्टा खरिद देखाई विभिन्न फर्महरूलाई विक्री बीजक मात्र जारी गरी उक्त फर्महरूबाट विक्री रकम भुक्तानी लिई सो बीजक मार्फत असुल गरेको मूल्य अभिवृद्धि कर रकम सरकारी कोषमा दाखिला नगरेको र विभिन्न फर्महरूलाई नक्कली एवं झुट्टा बीजक उपलब्ध गराई जालसाजी गरेको विभागले जनाएको छ । यस्तै भुमिहारबाट २५ करोड ३५ लाख ४१ हजार ५८४ रुपैयाँ विगो असुल गरी जरिवाना र कैद मागदावी लिई मुद्दा दर्ता गरिएको छ ।
विभाग अनुसार भुमिहारले मालबस्तु स्थानीय खरिद तथा आयात नगरी, विभिन्न फर्महरुबाट झुट्टा तथा नक्कली मु.अ.कर विजक लिई खरिद देखाई आयकर तर्फ खर्च दावी र मूल्य अभिवृद्धि कर तर्फ कर कट्टी दावी गरी मूल्य अभिवृद्धि कर र आयकर समेतको राजस्व चुहावटको कसूरमा उच्च अदालत पाटन ललितपुरमा मुद्दा दर्ता गरिएको हो ।
वि.सं.२०७८ असार ३० बुधवार १७:२८ मा प्रकाशित