काठमाडौं । आर्थिक वर्ष २०७७-०७८ मा राज्यले ९२.७४ प्रतिशत राजस्व संकलन गर्दा ८०.०८ प्रतिशत बजेट खर्च भएको छ ।
महालेखा नियन्त्रक कार्यालयका अनुसार उक्त आवमा सरकारले १० खर्ब ११ अर्ब ७५ करोड ८४ लाख रुपैयाँ राजस्व संकलन गर्ने लक्ष्य राखेको भएपनि आर्थिक वर्षको अन्तिम दिनसम्ममा ९ खर्ब ३८ अर्ब ३२ करोड २३ लाख रुपैयाँ अर्थात ९२.७४ प्रतिशत राजस्व संकलन भएको छ ।
सरकारले गत आवमा कर राजस्वतर्फको ९ खर्ब १२ अर्ब ९४ करोड ९० लाख रुपैयाँ संकलन गर्ने लक्ष्य राखेको भएपनि लक्ष्यको ९५.३१ प्रतिशत अर्थात ८ खर्ब ७० अर्ब ११ करोड ३६ लाख रुपैयाँ संकलन भएको छ ।
यता गैरकर राजस्व तर्फ सरकारले ९८ अर्ब ८० करोड ९४ लाख रुपैयाँ संकलन गर्ने लक्ष्य राखेपनि लक्ष्यको ६९.०३ प्रतिशत अर्थात ६८ अर्ब २० करोड ८७ लाख रुपैयाँ मात्रै गैरकर राजस्व संकलन भएको छ ।
आर्थिक वर्ष २०७७-७८ मा सरकारले कुल ६० अर्ब ५२ करोड ७७ लाख रुपैयाँ वैदेशिक अनुदान लिने लक्ष्य राखेको भएपनि लक्ष्यको ३३.९७ प्रतिशत अर्थात २० अर्ब ५६ करोड २७ लाख रुपैयाँ मात्रै अनुदान पाएको छ ।
आर्थिक वर्ष २०७७-७८ मा पुँजीगत खर्च ६४.६९ प्रतिशतमा सिमित भएको छ भने चालु खर्च ८९.७५ प्रतिशत भएको छ । गत आवमा सरकारले पुँजीगततर्फ ३ खर्ब ५२ अर्ब ९१ करोड ७५ लाख रुपैयाँ बजेट विनियोजन गरेकोमा त्यसको ६४.६९ प्रतिशत अर्थात २ खर्ब २८ अर्ब ३० करोड ६ लाख रुपैयाँ मात्रै खर्च भएको छ ।
यस्तै चालुतर्फ ९ खर्ब ४८ अर्ब ९४ करोड ६ लाख रुपैयाँ विनियोजन गरेकोमा ८९. ७५ प्रतिशत अर्थात ८ खर्ब ५१ अर्ब ६७ करोड ८२ लाख रुपैयाँ खर्च भएको छ ।
महालेखाका अनुसार वित्तीय व्यवस्थापनतर्फ लक्ष्यको ५८.४४ प्रतिशत खर्च भएको छ । सरकारले १ खर्ब ७२ अर्ब ७८ करोड ७३ लाख रुपैयाँ विनियोजन गरेकोमा १ खर्ब ९७ करोड ४१ लाख रुपैयाँ खर्च भएको छ ।
वि.सं.२०७८ साउन १ शुक्रवार १२:५९ मा प्रकाशित