काठमाडौं । सिडिएससीले पूँजीगत लाभकर गणनाको नयाँ व्यवस्था गरेसँगै मेरो सेयर सुस्त रुपमा चल्दा लगानीकर्ताले सेयर इडिआईएस गर्न समस्या भएको छ ।
लगानीकर्ताले एइडिआईएस गर्न समस्या भएको चौतर्फी गुनासो गरेपछि सिडिएससीले समय थप्ने भएको छ । लगानीकर्ताले आइतबार बिक्री गरेको सेयर सोमबार २ बजेसम्ममा इडिआइएस गरिसक्नुपर्ने थियो । मेरो सेयर राम्रोसँग नचलेका कारण ईडिआईएस हुन सकेको थिएन । समयमा नै ईडिआईएस गर्न नपाएका लगानीकर्ताका लागि सिडिएससीले समय थपेर भोली बिहान १० बजेसम्म ईडिआईएस गर्न सक्ने व्यवस्था गर्ने जनाएको छ ।
सिडिएससीका प्रवक्ता सुरेश न्यौपानेले मेरो सेयरमा पहिला सामान्य समस्या देखिएपनि अहिले त्यो समस्या नरहेको र ईडिआईएस गर्ने समय पनि थप्ने बताउनुभयो । सिडिएससीका कारण कुनै पनि लगानीकर्ता क्लोजआउटमा नगर्ने उहाँको भनाई छ ।
प्रवक्ता न्यौपानेका अनुसार यो सूचना मेरो सेयरमा नै आउने छ । उहाँका अनुसार नयाँ व्यवस्थासँगै सिस्टम अपग्रेड गर्दा केही सुस्त भएपनि अहिले त्यो समस्या छैन । नयाँ सिस्टम अपग्रेड गरिएकोले त्यो सिस्टममा केही अप्टिमाइज भइरहेकोले सुस्त जस्तो देखिएपनि अहिले अप्टिमाइजको काम सकिन लागेको र अब पहिलाको भन्दा तिब्र गतिमा चल्ने उहाँको दाबी छ ।
सरकारले चालु आर्थिक वर्षको बजेटमा नै १ वर्ष भन्दा कम अवधिको सेयर बिक्री गर्दा ७.५ र १ वर्ष भन्दा बढी अवधिको सेयर बिक्री गर्दा ५ प्रतिशत पुँजीगत लाभकर लगाउने व्यवस्था गरेको छ । त्यसको लागि सिस्टम बनाउँदा मेरो सेयर सुस्त देखिएको हो । सरकारले गरेको नयाँ व्यवस्थासँगै सिडिएससीले पनि मेरो सेयरमा उक्त व्यवस्था कार्यान्वयन गर्ने गरी थप गरेको छ ।
वि.सं.२०७८ साउन ४ सोमवार १८:३३ मा प्रकाशित