काठमाडौं । गत आर्थिक वर्ष कोरोना महामारीका बीचमा पनि १५ खर्ब ३९ अर्ब ८३ करोड ७० लाख ६८ हजार रुपैयाँको वस्तु तथा सेवा आयात भएको छ । यस्तै १ खर्ब ४१ अर्ब १२ करोड ४० लाख ८० हजार रुपैयाँ निर्यात भएको छ । यो अवधिमा आयात २८.६६ प्रतिशतले बढ्दा निर्यात ४४.४३ प्रतिशतले बढेको छ ।
भन्सार विभागका अनुसार देशभरका २४ वटा भन्सार विभागबाट उक्त आयात हुँदा निर्यात भने १४ वटा भन्सारबाट मात्रै भएको छ ।
२४ वटा भन्सार नाकामा सबैभन्दा बढी आयात वीरगञ्जबाट भएको छ । वीरगञ्जबाट एक वर्षमा ५ खर्ब ११ अर्ब ७५ करोड ४४ लाख ८० हजार रुपैपाँको आयात हुँदा निर्यात ५३ अर्ब ६७ करोड ९३ लाख ४ हजार रुपैयाँको वस्तु तथा सेवा आयात भएको छ ।
वस्तु तथा सेवा धेरै आयात गर्ने दोस्रो भन्सारमा भैरहवा रहेको छ । भैरहवा भन्सार नाकाबाट २ खर्ब ८१ अर्ब ६१ करोड ६० लाख ५३ हजार रुपैयाँको वस्तु तथा सेवा आयात भएको छ भने ६ अर्ब ६२ करोड ३३ लाख ६२ हजार रुपैयाँको निर्यात भएको छ ।
विभागका अनुसार १ खर्ब भन्दा बढी वस्तु तथा सेवा आयात गर्ने भन्सारमा बिराटनगर, १ खर्ब ८९ अर्ब ६५ करोड ५० लाख ७९ हजार, ड्राइपोर्ट १ खर्ब ८९ अर्ब ३८ करोड १९ लाख ६९ हजार रुपैयाँ र अन्तर्राष्ट्रिय विमानस्थलबाट १ खर्ब ४३ अर्ब ३७ करोड ३६ लाख ८० हजार रुपैयाँको वस्तु तथा सेवा आयात भएको छ ।
सबै भन्दा कम राजबिराज भन्सार नाकाबाट १६ करोड ९० लाख ७७ हजार रुपैयाँको मात्रै वस्तु तथा सेवा आयात भएको छ । विभागका अनुसार बिराटनगरबा ३६ अर्ब ७६ करोड १४ लाख ६५ हजार रुपैयाँको निर्यात भएको छ भने ड्राईपोर्टबाट २ अर्ब ६८ करोड ११ लाख २ हजार, अन्तर्राष्ट्रिय विमानस्थलबाट २५ अर्ब ४१ करोड ४१ लाख १ हजार, नेपालगञ्जबाट २ अर्ब २४ करोड ५७ लाख ५८ हजार, मेची भन्सारबाट १२ अर्ब ६० करोड ८९ लाख २८ हजार, कैलालीबाट ५९ करोड २ लाख ७९ हजार, कृष्णनगरबाट ३३ करोड २२ लाख १३ हजार, सिधौलीबाट १४ करोड ६६ लाख ६० हजार, सर्लाहीबाट २ लाख ६१ हजार, कञ्चनपुरबाट ३ करोड १६ लाख ८९ हजार र गौरी नाकाबाट ८८ लाख ८८ हजार रुपैयाँको वस्तु तथा सेवा निर्यात भएको छ ।
विभागका अनुसार भन्सार विभागको तथ्याङ्क अनुसार एक वर्षको अवधिमा १० वटा भन्सारबाट निर्यात शून्य रहेको छ । जसमा रसुवा, तातोपानी, जलेश्वर, सुनसरी, जनकपुर, महेश्वर, ठाडी, सिराहा, भद्रपुर र राजविराज भन्सारबाट कुनै पनि वस्तु तथा सेवा निर्यात भएको छैन ।
वि.सं.२०७८ साउन ९ शनिवार १२:३५ मा प्रकाशित
