काठमाडौं । एनआईसी एशिया बैंकले बैंकिङ्ग क्षेत्रमै पहिलोपटक मोबाइल बैंकिङ्गएपमार्फत विभिन्न कम्पनीहरूले जारी गर्ने आईपीओमा आवेदन दिन सकिने सेवाको शुभारम्भ गरेको छ ।
सहज डिजिटल बैंकिङ्ग सेवा प्रदान गर्दै आइरहेको बैंकले ग्राहकहरुलाई लामो लाइन बसी आईपीओ फारम बुझाउने झन्झटलाई न्यूनिकरण गर्ने उद्देश्यले उक्त सेवा शुभारम्भ गरेको हो ।
बैंकमार्फत डिम्याट खाता खोलेका र बैंकमा बचत खाता तथा बैंकको मोबाइल बैंकिङ्ग सेवा लिएकाहरुले आईपीओ खुलेका सेयर तथा डिवेञ्चरहरूमा जुनसुकै स्थानबाट, जुनसुकै समयमा आवेदन दिन सकिने बेंकले जनाएको छ ।
कोरोना महामारीको जोखिम कायम रहेका बेला ग्राहकहरुलाई थप सहज एवं सरल बैंकिङ्ग सेवा दिनका लागि बैंकले हालसम्म भौतिक फारमबाट आईपीओ आवेदन लिँदै आएकोमा अब देखि बैंकसम्म नपुगि एनआईसी एशिया मोबैंकबाट आवेदन सकिने भएको हो ।
बैंकको मोबाइल बैंकिङ एप प्रयोगकर्ताहरुले एप भित्र रहेको अप्लाई सेयर आइकनमा ट्याप गरेर आवेदन दिन सक्नुहुनेछ ।अप्लाई सेयर आइकनमा ट्याप गरेपश्चात् त्यसभित्र आईपिओ खुलेका कम्पनीहरूमध्ये आफुले चाहेको कम्पनी छनौट गरेर आवेदन दिनुपर्नेछ ।
त्यसपछि आफुले इच्छाएको कित्ता संख्या उल्लेख गर्ने र सो बाहेकको स्वचालित रुपमा देखिएको विवरण पक्का गरी कम्पनीको शर्त तथा नियम पालना गरेर सम्मिट गरेपश्चात आवेदन पूरा हुनेछ । साथै स्मार्टफोन प्रयोग गरी आईपीओ आवेदन दिन सक्ने हुँदा यस सुविधाबाट भौतिक रुपमा बैंकमा उपस्थित भई फारम भरेर आवेदन दिनुपर्ने झन्झबाट मुक्ति मिल्ने बैंकले विश्वास लिएको छ ।
यसरी घरमै बसेर आईपीओ भर्ने सुविधा लिनका लागि बैंकका ग्राहकहरूले एनआईसी एशिया मो बैंक एप डाउनलोड गरी तथा बैंकमा डिम्याट खाता खोली वा अहिलेसम्म बैंकमा आबद्ध नहुनुभएमा बचत खाता खोलेर मो बैंक डाउनलोड तथा यस बैंकमा डिम्याट खाता खोली समयमै आईपीओ भर्ने सुविधाबाट लाभान्वित हुन सक्नुहुनेछ ।
साथै बैंकले आफ्नो वेबसाइट www.nicasiabank.com मा रहेको अप्लाई सेयर आइकनमा ट्याप गरेर समेत आईपीओ आवेदन दिन सकिने व्यवस्था गरेको छ ।
वि.सं.२०७८ साउन ११ सोमवार १०:२५ मा प्रकाशित