काठमाडौं । संघीय संसद सचिवालयको सम्पूर्ण सरकारी कारोबार अब राष्ट्रिय वाणिज्य बैंकबाट हुने भएको छ । अथक प्रयत्न पछि नीजि बैंकबाट हुँदै आएको कारोबार उक्त बैंक मार्फत हुने भएको हो ।
यसअघि सरकारी खाता निजी बैंक मार्फत सञ्चालन गरिएको बिषय संघीय संसद र अन्य सार्वजनिक कार्यक्रमहरु र संचार माध्यमहरुमा समेत पटक पटक उठाइएको थियो ।
संघीय संसद सचिवालयले २०७७ मंसिर १८ गते सरकारी कारोबार गर्ने बैंक परिवर्तन गरी पूर्ण सरकारी स्वामित्व भएको राष्ट्रिय वाणिज्य बैंक मार्फत गर्ने व्यवस्था मिलाउन अर्थ मन्त्रालयलाई पत्राचार गरेको थियो ।
२०७७ माघ ११ को पत्रबाट आर्थिक बर्षको बिचमा खाता परिवर्तन गर्न कठिनाई हुने जनकारी अर्थ मन्त्रालयबाट प्राप्त भएको थियो । सचिवालयले २०७८ असार ३१ गते पुनः ताकेता गरी खाता परिवर्तनका लागि अनुरोध गरेको थियो ।
अर्थ मन्त्रालयले नेपाल राष्ट्र बैंक तथा महालेखा नियन्त्रकको कार्यालय मार्फत हालै सिंहदरबार स्थित सबै कार्यालयका सरकारी खाताहरू राष्ट्रिय वाणिज्य बैंक मार्फत संचालन गर्न निर्देशन दिएको छ ।
त्यसै गरि राष्ट्रिय बाणिज्य बैंकलाई समेत सिंहदरवार शाखाको स्तरोन्नति र सेवा सुबिधा विस्तरको लागि समेत अनुरोध गरिएको छ । यस अघि सरकारी खाताहरु एभरेष्ट बैंक मार्फत संचालन गरिएको थियो ।
वि.सं.२०७८ साउन १७ आइतवार १२:४४ मा प्रकाशित
