काठमाडौं । सेयर बजारले नयाँ रेकर्ड कायम गरेको छ । मंगलबारको कारोबारमा बजार मापन गर्ने सूचक २६.०२ अंकले बढेर ३१११.०९ बिन्दुमा रोकिएको छ । पुँजी बजारमा नेप्से परिसूचक अहिलेसम्मकै उच्च बिन्दुमा पुगेको छ ।
२२३ कम्पनीको २ करोड ११ लाख २९ हजार ८८ कित्ता सेयर ११ अर्ब ५२ करोड ९२ लाख १७ हजार ७७४ रुपैयाँमा किनबेच भएको छ ।
केही समय यता सामान्य उतार चढाव भएको बजारमा मंगलबार दोहोरो अंकको बढोत्तरी देखिएको छ । साउन पहिलो साता आउनु पर्ने मौद्रिक नीति अझैसम्म नआएको र बजारको विषयमा चल्ने विभिन्न हल्लाका कारण बजार सामान्य करेक्सनमा चलिरहेको थियो ।
मौद्रिक नीतिको विषयमा राष्ट्र बैंकका गभर्नर महाप्रसाद अधिकारीले नै प्रष्ट धारणा राखेको, राष्ट्र बैंकको स्वायत्ततामा अर्थ मन्त्रालयले कुनै हस्तक्षेप नगरेको, मौद्रिक नीतिमा पनि कुनै अवरोध नगरेको जस्ता धारणा बाहिर आएपछि लगानीकर्तामा आत्मबल बढेको देखिएको छ । जसले गर्दा बजार बढन सहयोग गरेको जानकारहरुको भनाई छ ।
यो दिन कारोबार रकमको आधारमा अपी पावर कम्पनी अग्रस्थानमा रहेको छ । कम्पनीको ४६ करोड ८२ लाख ९० रुपैयाँको सेयर किनबेच भएको छ । दोस्रो र तेस्रो स्थानमा क्रमशः नाग्दी ग्रुप पावर र फस्ट माइक्रोफाइनान्स डेभलपमेन्ट बैंक रहेका छन् ।
वि.सं.२०७८ साउन १९ मंगलवार १५:११ मा प्रकाशित
