काठमाडौं । प्रहरीले पुरातात्विक धार्मिक महत्वको बहुमूल्य धर्मग्रन्थ भन्दै नगद १३ लाख ७९ हजार रुपैयाँ ठगी गरेको अभियोगमा २ जनालाई पक्राउ गरेको छ ।
दुवैजनालाई गोकर्णेश्वर नगरपालिका–८ आरुबारीबाट बिहीबार प्रहरीले पक्राउ गरेको हो ।
पक्राउ पर्नेहरुमा काठमाडौं माकलबारी बस्ने नुवाकोट शिवपुरी गाउँपालिका–१ घर भएका २० वर्षीय आशिष लामा तामाङ र काठमाडौं महानगरपालिका–७ चावहिल सरस्वतीनगर बस्ने भोजपुर रामप्रसाद गाउँपालिका–७ घर भएका ३० वर्षीय रजिन राई रहेका छन् ।
काठमाडौं गोकर्णेश्वर नगरपालिका–८ आरुबारी बस्ने उदयपुर चौदण्डिगढी नगरपालिका–८ घर भएका १ पुरुषलाई साउन १४ प्राचिन पुरातात्विक बौद्ध ग्रन्थको ३ करोड ८५ लाख रुपैयाँमा खरिद बिक्री गर्ने भन्दै झुक्यानमा पारी उक्त नगद ठगी गर्ने कार्यमा संलग्न उनीहरुलाई महानगरीय अपराध महाशाखा मिनभवनबाट खटिएको प्रहरीले पक्राउ गरेको हो ।
उनीहरुलाई आवश्यक कारवाहीका लागि महानगरीय प्रहरी परिसर काठमाडौं पठाइएको उक्त महाशाखाले जनाएको छ ।
वि.सं.२०७८ साउन २२ शुक्रवार १७:३१ मा प्रकाशित
