काठमाडौं । गैरआवासीय नेपाली संघका प्रतिनिधि र प्रधानमन्त्री शेरबहादुर देउवाबीच भेटवार्ता भएको छ ।
गैरआवासीय नेपाली संघका अध्यक्ष कुमार पन्तले हालसम्म संघले सरकारसँग गरेको सहकार्यबारे स्मरण गराउँदै लामो समयदेखि संसदमा विचाराधीन गैरआवासीय नेपाली नागरिकताको विधेयकका सम्बन्धमा प्रधानमन्त्री देउवाको ध्यानाकर्षण गराउनुभयो ।
पछिल्लो विषम अवस्थामा विदेशमा रहेका नेपाली श्रमिकहरुको उद्धार, नेपाल ल्याइएका श्रमिकहरुको पुर्नस्थापना लगायतका विषयमा सरकारले यथाशक्य छिटो राहतमुखी कार्यक्रम ल्याउन अध्यक्ष पन्तले आग्रह गर्नुभयो ।
भेटमा पूर्व अध्यक्ष जीवा लामिछानेले बेलायतमा रहेका बिट्रिश गोर्खाको सत्याग्रहको विषयमा प्रधानमन्त्री देउवाको ध्यानाकर्षण गराउँदै उनीहरुको समस्या समाधानका लागि बेलायत सरकारसँग कूटनीतिक रुपमा पहल गरिदिन आग्रह गर्नुभयो । यस्तै उहाँले लामो समयदेखि विचाराधीन गैरआवासीय नेपाली नागरिकताको विषयमा पनि प्रधानमन्त्री देउवाको ध्यानाकर्षण गराउनुभयो ।
सो क्रममा प्रधानमन्त्री देउवाले संविधानमा व्यवस्था भए बमोजिम छिट्टै गैरआवासीय नेपाली नागरिकता लगायतका विषय टुंगो लगाउने प्रतिबद्धता व्यक्त गर्नुभयो ।
वि.सं.२०७८ साउन २६ मंगलवार १३:१२ मा प्रकाशित
