काठमाडौं । अर्थमन्त्री जनार्दन शर्माले सिसिएमसीको विषयमा सरकारमा निकै छलफल भएको र सोही अनुसारको योजना बनेको बताउनु भएको छ ।
प्रतिनिधि सभाको बैठकमा स्वेतपत्र प्रस्तुत गरेपछि सांसदले सोधेको प्रश्नको जवाफ दिने क्रममा यस्तो बताउनु भएको छ । तर उहाँले के योजना बनेको भनेर खुलाउन चाहनु भएन ।
बैठकमा मन्त्री शर्माले अघिल्लो सरकारले गरेको कामको डाटा राखेको हो र त्यही डाटाको बारेमा नै जानकारी गराएको बताउनुभयो । उहाँले विगतमा हुन नसकेका कामलाई आरोप लगाउनु भन्दा पनि शिक्षाको रुपमा राखेको जानकारी गराउनुभयो ।
मन्त्री शर्माले केही सहकारीले जनताको पैसा लिएर भागेको सुनिएको भन्दै त्यस्ता सहकारीको विषयमा अध्ययन सुरु भएको जानकारी गराउनु भयो । उहाँले नियमन गर्ने निकायले अध्ययन गरेर कारबाही गर्ने जानकारी गराउनुभयो । सांसद साझेदारी कार्यक्रम जनचाहना अनुसार हुने उहाँको भनाई छ ।
कोरिया जान लागेका नेपालीलाई पठाउने विषयमा सरकारले छलफल सुरु गरेको जानकारी गराउँदै १९ अर्ब बराबरको बालबालिकाको लागि खोप किन्ने तयारी भएको बताउनु भयो । त्यसको लागि अर्थले बजेट स्वीकृत जानकारी गराउनुभयो ।
वि.सं.२०७८ साउन २६ मंगलवार १६:१८ मा प्रकाशित