काठमाडौं । एक वर्षको अवधिमा सुनको मूल्यमा भारी गिरावट आएको छ । गत वर्षको साउन महिनाको अन्तिम कारोबार दिनदेखि यस वर्षको साउन अन्यतसम्म आउँदा सुनको मूल्यमा ७ हजार ७ सय रुपैयाँको गिरावट आएको हो ।
गत साउन मसान्तमा ९८ हजार ४ सय रुपैयाँमा खरिदबिक्री भएको छापावाला सुनको मूल्य यस वर्षको साउन मसान्तमा भने घटेर ९० हजार ७ सय रुपैयाँमा झरेको छ ।
गत वर्षको साउन महिना सुनको मूल्य इतिहासकै उच्च वृद्धि भई १ लाख ३ हजार ५ सय रुपैयाँ पगेको थियो । नेपाल सुनचाँदी व्यवसायी महासंघका अनुसार यो वर्षको साउन भने ९३ हजार २ सय रुपैयाँ भन्दा माथि पुग्न सकेन । गत वर्ष साउन २३ गते नेपाली बजारमा सुनको मूल्य १ लाख ३ हजार ५ सय रुपैयाँ कायम भई ऐतिहासिक रेकर्ड बनाएको थियो ।
यस्तै, गत वर्षको साउन महिना र यो वर्षको साउन मसान्तसम्म आईपुग्दा तेजावी सुनको मूल्य ९० हजार १ सय रुपैयाँ कायम भएको छ । तेजावी सुन गत वर्षको साउन अन्त्यमा ९७ हजार ९ सय रुपैयाँ पुगेको थियो ।
त्यसैगरि उक्त अवधिमा चाँदीको मूल्यमा भने १२५ रुपैयाँको गिरावट आएको छ । गत साउन महिनाको अन्तिम कारोबार दिन १३ सय २५ रुपैयाँ कारोबार चाँदीको भाउ यो वर्ष साउन अन्त्यसम्म आईपुग्दा १२ सय रुपैयाँमा झरेको छ ।
वि.सं.२०७८ भदौ २ बुधवार ०९:४९ मा प्रकाशित
