बिक्रम सुनार,
काठमाडौं । गत आथिक वर्षमा निर्जीबन बीमा कम्पनीहरुको नाफामा सामान्य सुधार देखिएको छ । कोरोना महामारीको असर निर्जीबन बीमा कम्पनीमा देखिएको छ । जसका कारण कम्पनीहरुको नाफामा उल्लेख्य सुधार आउन सकेको छैन ।
निर्जीबन बीमा कम्पनीको नाफामा अघिल्लो आवको चौथो त्रैमासको तुलनामा गत आवको सोही अवधिमा सामान्य मात्रै बढोत्तरी देखिएको छ । अघिल्लो आवको तुलनामा गत आवका निर्जीन बीमा कम्पनीको नाफा ७.३३ प्रतिशतले बढेको छ ।
अघिल्लो आवको चौथो त्रैमासमा ४ अर्ब ३० करोड ६३ लाख ९१ हजार रुपैयाँ नाफा आर्जन गरेका निर्जीबन बीमा कम्पनीले गत आवको सोही अवधिमा ४ अर्ब ६२ करोड २२ लाख ८७ हजार रुपैयाँ नाफा आर्जन गरेका छन् ।
यो अवधिमा तीन वटा कम्पनीको नाफामा गिरावट आएको छ भने बाँकीको नाफामा सुधार देखिएको छ । नाफा घट्ने कम्पनीहरुमा हिमालयन जनरल इन्स्यारेन्सको ३३.४० प्रतिशत, सरकारी स्वामित्वको राष्ट्रिय बीमा कम्पनीको ४३.५७ प्रतिशत र लुम्बिनी जनरल इन्स्योरेन्सको १५.४८ प्रतिशत रहेको छ ।
गत आवमा सबैभन्दा बढी नाफा नेको इन्स्योरेन्सले ५४ करोड ६ लाख ३६ हजार रुपैयाँ रहेको छ । यसअघि नाफा आर्जनमा सँधै अग्रस्थानमा रहने गरेको शिखर इन्स्योरेन्सलाई नेकोले पछि पारेको छ । यो पटक शिखर दोस्रो स्थानमा रहेको छ ।
शिखर इन्स्योरेन्सले गत आवको चौथो त्रैमाससम्ममा ४७ करोड ५७ लाख ३६ हजार रुपैयाँ नाफा आर्जन गरेको छ । धेरै नाफा आर्जन गर्ने कम्पनीमध्ये तेस्रो नम्बरमा सगरमाथा इन्स्योरेन्स रहेको छ । कम्पनीले ४५ करोड १५ लाख ९० हजार रुपैयाँ नाफा आर्जन गरेको छ ।
गत आवको चौथो त्रैमाससम्ममा सबैभन्दा थोरै नाफा आर्जन गर्नेमा युनाइटेड इन्स्योरेन्स रहेको छ । इन्स्योरेन्सले ७ करोड ५२ लाख ३१ हजार रुपैयाँ रहेको छ । तर प्रतिशतको आधारमा हेर्दा सबैभन्दा बढी पनि युनाइटेडकै रहेको छ । कम्पनीको नाफा ३३०.३८ प्रतिशतले बढेको छ । नाफा १ प्रतिशत पनि नबढेका कम्पनीमा प्रभु इन्स्योरेन्स र एभरेष्ट इन्स्योरेन्स रहेका छन् ।
वि.सं.२०७८ भदौ ३ बिहीवार १५:५४ मा प्रकाशित
