काठमाडौं । नेपाल राष्ट्र बैंकले राज्यको नीति निर्देशन विपरीत १ अर्ब २४ करोड ४५ लाख ३२ हजार रुपैयाँ भत्ता बाँडेको छ ।
महालेखापरीक्षको कार्यालयले सार्वजनिक गरेको ५८ औं प्रतिवेदन २०७८ मा उक्त कुरा रहेको छ । राष्ट्र बैंकले आर्थिक वर्ष २०७६-०७७ मा सरकारले २०७५ वैशाख २६ गते जारी गरेको सरकारी खर्चमा मित्तव्ययिता सम्बन्धी निर्देशिका २०७५ को बुँदा २६ को विरुद्धमा रहेर भत्ता वितरण गरेको देखिएको छ ।
उक्त बुँदामा सरकारी निकायले प्रदान गर्ने महंगी भत्ता, लगा भत्ता र स्थानीय भत्ता बाहेक अन्य सबै प्रकारका भत्ता खारेज गरेको थियो । तर नेपाल राष्ट्र बैंकले बैंक भत्ता, खाजा भत्ता, बार्षिकोत्सव भत्ता, क्लोजिङ भत्ता, इन्टरनेट भत्ता, आउटस्टेसन भत्ता, कर्मचारी कल्याणा कोष समेत गरी १५ किसिमका भत्ता बापत १ अर्ब २४ करोड ४५ लाख ३२ हजार रुपैयाँ भुक्तानी गरेको छ । उक्त रकम असुल्न सरकारलाई निर्देशन दिँदै सरकारको निर्देशन पालना गर्न महालेखाले राष्ट्र बैंकलाई भनेको छ ।
वि.सं.२०७८ भदौ ४ शुक्रवार १८:२० मा प्रकाशित