काठमाडौं । नेपालमा कुल ७५३ स्थानीय तहमध्ये अझै पनि ३ गाउँपालिका बैंकको शाखा पुग्न सकेको छैन । राष्ट्र बैंकले बिहीवार सार्वजनिक गरेको तथ्याङ्कले यस्तो देखाएको हो ।
कुल स्थानीय तहमध्ये २०७८ असार मसान्तसम्म ७५० तहमा बैंकका शाखा पुगेका छन् । तर, धादिङको रुवीभ्याली गाउँपालिका, जाजरकोटको जुनीचाँदे र बझाङको साइपाल गाउँपालिकामा बैंकका शाखा नपुगेका हुन् ।
२०७७ असारसम्म ७४७ स्थानीय तहमा वाणिज्य बैंकहरुीका शाखा विस्तार भएका थिए । २०७८ असार मसान्तसम्म राष्ट्र बैंकबाट इजाजतप्राप्त बैंक तथा वित्तीय संस्थाहरुको संख्या १३३ रहेको छ ।
यीमध्ये २७ वाणिज्य बैंक, १८ विकास बैंक, १७ वित्त कम्पनी र ७० वटा लघुवित्त वित्तीय संस्था र १ पूर्वाधार विकास बैंक संचालनमा रहेका छन् ।
२०७८ असार मसान्तसम्म बैंक तथा वित्तीय संस्थाहरुको शाखा संख्या १० हजार ६८३ पुगेको छ । अघिल्लो वर्षको सोही अवधिसम्म ९ हजार ७६५ रहेको थियो ।
वि.सं.२०७८ भदौ १० बिहीवार १६:५१ मा प्रकाशित
