काठमाडौं । चालु आर्थिक वर्ष २०७८/७९ पहिलो महिनामा साढे ५ अर्ब बढीको सुनचाँदी आयात भएको छ । भन्सार विभागले हालै सार्वजनिक गरेको आव २०७८/७९ को पहिलो महिना अर्थात साउन तथ्याङ्कले यस्तो देखाएको हो ।
साउन महिनामा ५ अर्ब ७८ करोड ६५ लाख ५६ हजार रुपैयाँ बराबरको सुनचाँदी आयात भएको विभागले जनाएको छ । उक्त अवधिमा सवा ३ अर्ब बढीको सुन र साढे २ अर्ब बढीको चाँदी आयात भएको छ ।
विभागका अनुसार साउनमा ३ अर्ब १६ करोड ४७ लाख ७९ हजार रुपैयाँको सुन आयात भएको हो । चालु आवको पहिलो महिनामा ४ सय ५८ केजी बढी सुन आयात भएको हो । नेपालमा युनाईटेड अरब इमिरेट्स (यूएई) बाट सुन आएको विभागले जनाएको छ ।
चालु आवको पहिलो महिनामा यूएईबाट २ अर्ब ८१ करोड ५० लाख ५४ हजार रुपैयाँ बराबरको सुन नेपाल भित्रिएको हो । उक्त देशबाट ४०७ केजी सुन आयात भएको विभागले जनाएको छ ।
यस्तै, टर्कीबाट करिव ३५ करोड बराबरको सुन नेपाल आएको छ । उक्त मुलुकबाट ३४ करोड ९७ लाख २५ हजार रुपैयाँ बराबरको ५१ केजी बढी सुनको नेपाल भित्रिएको छ । सुन आयातबाट नेपाल सरकारले ३८ करोड ९७ लाख २६ हजार रुपैयाँ राजस्व प्राप्त गरेको छ ।
यस्तै चालु आवको पहिलो महिनामा साढे २ अर्ब बढीको चाँदी आयात भएको विभागले जनाएको छ । नेपालमा विश्वका ५ मुलुकबाट २ अर्ब ६२ करोड १७ लाख ७७ हजार रुपैयाँ बराबरको चाँदी आयात भएको हो ।
नेपालमा छिमेकी मुलुक चीन, हङ्कङ, स्वीट्जरल्याण्ड, टर्की र यूएईबाट २६ हजार २ सय केजी चाँदी आयात भएको विभागले जनाएको छ ।
चालु आवको पहिलो महिनामा सबैभन्दा बढी यूएईबाट १ अर्ब २५ करोड २२ लाख ९० हजार रुपैयाँ बराबरको साढे १२ हजार केजी चाँदी आयात भएको छ ।
यस्तै, हङकङबाट ८० करोड १३ लाख ८५ हजार, स्वीट्जरल्याण्डबाट ४० करोड ३ लाख ७५ हजार रुपैयाँ बराबरको चाँदी नेपाल भित्रिएको छ ।
त्यसैगरि टर्कीबाट ९ करोड ८२ लाख ९५ हजार र चीनबाट ६ करोड ९४ लाख ३२ हजार रुपैयाँ बराबरको चाँदी आयात भएको छ । चाँदी आयातबाट सरकारले २२ करोड २७ लाख २ हजार रुपैयाँ राजस्व प्राप्त गरेको छ ।
वि.सं.२०७८ भदौ ११ शुक्रवार १७:१४ मा प्रकाशित
