काठमाडौं । चालु आर्थिक वर्ष २०७८/७९ को पहिलो महिनमा साढे २४ करोड बढीको लसुन, प्याज आयात भएको छ । भन्सार विभागले हालै सार्वजनिक गरेको साउन महिनाको तथ्याङ्कले यस्तो देखाएको हो ।
चालु आवको साउन महिनमा ५ करोड ९१ लाख १९ हजार रुपैयाँको लसुन र १८ करोड ६० लाख ६६ हजार रुपैयाँ बराबरको प्याज नेपाल भित्रिएको छ ।
नेपालमा छिमेकी दुई मुलुक चीन र भारत लगायतका देशबाट लसुन, प्याज आयात हुने गरेको छ । नेपाली बजारमा चिनियाँ लसुनको बर्चस्व देखिएको छ ।
चालु आवको पहिलो महिनामा चीनबाट ५ करोड ९१ लाख ९ हजार रुपैयाँ बराबरको लसुन नेपाल आएको छ । उक्त अवधिमा चीनबाट ५९ हजार १०९ केजी लसुन आयात भएको विभागले जनाएको छ ।
साउन महिनामा भारतबाट १० हजार रुपैयाँ बराबरको ११० केजी लसुन आयात भएको हो । दुई मुलुकबाट भएको लसुन आयातबाट सरकारले १ करोड ४४ लाख १० हजार रुपैयाँ राजस्व प्राप्त गरेको छ ।
यस्तै, चालु आवको पहिलो महिनामा १८ करोड ६० लाख ६६ हजार रुपैयाँ बराबरको प्याज आयात भएको छ । उक्त अवधिमा भारतबाट मात्रै ४ हजार ९०५ टन बढी प्याज आयात भएको छ ।
विभागका अनुसार भारतबाट १८ करोड २० लाख ४२ हजार रुपैयाँ बराबरको प्याज नेपाल भित्रएको हो । चीनबाट भने ४० लाख २३ हजार रुपैयाँ बराबरको प्याज आयात भएइको विभागले जनाएको छ ।
प्याज आयातबाट नेपाल सरकारले १ करोड ६७ लाख ९० हजार रुपैयाँ राजस्व प्राप्त गरेको छ ।
वि.सं.२०७८ भदौ ११ शुक्रवार १८:१९ मा प्रकाशित
