काठमाडौं । चालु आर्थिक वर्ष २०७८/७९को पहिलो महिनामा १० करोड बढीको सुन गर गहना निर्यात भएको छ ।
भन्सार विभागले हालै सार्वजनिक गरेको साउन महिनाको तथ्याङ्कले यस्तो देखाएको हो । विभागका अनुसार साउन महिनामा १० करोड २८ लाख ३४ हजार रुपैयाँ बराबरको सुनका गर गहना निर्यात भएको छ ।
नेपालबाट अष्ट्रेलिया, हङकङ, अमेरिका लगायतका देशहरुमा सुनका गरगहनाको निर्यात हुने गरेको छ । विशेषगरी विदेशी मुलुकमा बन्न नसक्ने नेपाली मौलिक गर गहना नेपालबाट निर्यात हुने गर्दछ ।
विभागका अनुसार पछिल्लो समयमा नेपालीहरुको बसोबास बढी भएका मुलुकहरुमा गहना निर्यात हुने गरेको छ । चालु आवको पहिलो महिनामा सबैभन्दा बढी अमेरिका सुनका गहना निर्यात भएको छ ।
साउनमा नेपालबाट ९ करोड ४९ लाख ५७ हजार रुपैयाँ बराबरको गहना अमेरिका निर्यात भएको हो । अमेरिकामा ११ केजीभन्दा बढी सुनका गहना निर्यात भएको विभागले जनाएको छ ।
यस्तै, चालु आवको पहिलो महिनामा हङकङमा ७८ लाख ७७ हजार रुपैयाँ बराबरको गहना निर्यात भएको हो । उक्त मुलुकमा नेपाल बाट १ केजी सुनका मौलिक गहना निर्यात भएको विभागले जनाएको छ ।
नेपालबाट गत आर्थिक वर्षदेखि सुनका गहनाहरु निर्यात हुन थालेको हो । निर्यात हुन थालेको पहिलो वर्ष अर्थात आव २०६७७/७८ मा नेपालबाट ३८ करोड ७१ लाख ७६ हजार रुपैयाँ बराबरको गहना बाहिरिएको विभागले जनाएको छ । उक्त अवधिमा ३८ केजी सुनका गहना नेपालबाट निर्यात भएको थियो ।
यसैविच, चालु आवको पहिलो महिनामा भने ३ अर्ब १६ करोड ४७ लाख ७९ हजार रुपैयाँ बराबरको सुन आयात भएको छ । साउनमा ४५८ केजी बढी सुन आयात भएको विभागले जनाएको छ ।
नेपालमा युनाईटेड अरब इमिरेट्स (यूएई) बाट सुन आएको विभागले जनाएको छ । चालु आवको पहिलो महिनामा यूएईबाट २ अर्ब ८१ करोड ५० लाख ५४ हजार रुपैयाँ बराबरको सुन नेपाल भित्रिएको हो । उक्त देशबाट ४०७ केजी सुन आयात भएको विभागले जनाएको छ ।
यस्तै, टर्कीबाट करिव ३५ करोड बराबरको सुन नेपाल आएको छ । उक्त मुलुकबाट ३४ करोड ९७ लाख २५ हजार रुपैयाँ बराबरको ५१ केजी बढी सुनको नेपाल भित्रिएको छ । सुन आयातबाट नेपाल सरकारले ३८ करोड ९७ लाख २६ हजार रुपैयाँ राजस्व प्राप्त गरेको छ ।
वि.सं.२०७८ भदौ १३ आइतवार १७:२१ मा प्रकाशित