काठमाडौं । नेपाल सहकारी पत्रकार समाज(सिजेएन)ले नेपाल आर्थिक पत्रकार समाज (सेजन) का उम्मेद्वारसँग अन्तरक्रिया गरेको छ । अध्यक्षका प्रत्यासीसँग आर्थिक पत्रकारिताका विषयमा छलफल आयोजना भएको होे ।
सेजनको भदौ १८ गते हुने निर्वाचनमा अध्यक्षमा आशीष ज्ञवाली, जनार्दन बराल र शिरोमणि ढुंगानाले उम्मेदवारी दिने घोषणा गर्नुभएको छ । कार्यक्रममा अध्यक्षका उम्मेद्वारहरुले आर्थिक पत्रकारिताका क्षेत्रमा सशक्त भएर लाग्ने प्रतिवद्धता जनाउनु भएको छ । आर्थिक पत्रकारको क्षमता अभिवृद्धि गर्ने र अर्थतन्त्रका विविध विषयमा बहस चलाउने प्रतिबद्धता तीनै जनाको रहेको छ ।
अध्यक्षका उम्मेदवार आशीष ज्ञवालीले सञ्चार माध्यममा नवप्रवेशी पत्रकारको अभाव भएको भन्दै आर्थिक पत्रकार जन्माउने तर्फ सेजनले ध्यान दिने बताउनुभयो । आर्थिक पत्रकारितामा नयाँ कुरा आएकाले सेजनले आर्थिक पक्षका विविध क्षेत्रमा नवप्रववेशी पत्रकारलाई तालिम दिइने बताउनुभयो ।
सेजनका अध्यक्षका उम्मेदवार जनार्दन बरालले साझा धारणा बनाएर अघि बढ्ने बताउनुभयो । रिर्पोटिङ तथा डेक्समा म्यानपावर अभाव भएको भन्दै तालिम तथा सीप दिएर इन्टरसीपमा पठाउन सकिने बताउनुभयो ।
‘आचारसंहिता कार्यान्वयन गर्न भूमिका खेल्ने उहाँले बताउनुभयो । आर्थिक तथा पत्रकारिताका विद्यार्थीलाई पत्रकारितातर्फ आकर्षित गर्न विश्वविद्यालयसँग सहकार्य गरिने उहाँले बताउनुभयो ।
अध्यक्षका उम्मेदवार शिरोमणि ढुंगानाले पारदर्शिता र उत्तरदायित्वमा भूमिका खेल्ने बताउनुभयो । संस्था बलियो र प्रभावकारी बनाउन ध्यान दिइने बताउनुभयो । ‘अवसरमा विविधता छ, गुणात्मक काममा ध्यान दिनुपर्छ’ उहाँले भन्नुभयो ।
वि.सं.२०७८ भदौ १६ बुधवार १६:०७ मा प्रकाशित