काठमाडौं । चालु आर्थिक वर्ष २०७८/७९ को पहिलो महिनामा करिव ६ करोड रुपैयाँ बराबरको चाँदीका गहना निर्यात भएको छ ।
भन्सार विभागले हालै सार्वजनिक गरेको चालु आवको साउन महिनको तथ्याङ्कले यस्तो देखाएको हो । विभागका अनुसार साउन महिनामा ५ करोड ९४ लाख ६५ हजार रुपैयाँ बराबरको चाँदीका गहना बाहिरिएको हो ।
नेपालबाट विश्वका १० मुलुकहरुमा चाँदीका गहनाहरु निर्यात हुने गरेको छ । साउन महिनामा ४ हजार ९०५ केजी बढी चाँदीका गहना निर्यात भएको विभागले जनाएको छ । नेपालीहरुको बसोबास बढीको रहेको विदेशी मुलुहरुमा र त्यहाँ बन्न नसक्ने गहना निर्यात हुने गरेको छ ।
सबैभन्दा बढी अमेरिकमा चाँदीका गहना पुगेको छ । चालु आवको पहिलो महिनामा अमेरिकामा ४ करोड ३० लाख ९८ हजार रुपैयाँ बराबरको गहना पुगेको हो । अमेरिकामा ४ हजार ८२७ केजी चाँदीका गहना निर्यात भएको हो ।
अमेरिकापछि सबैभन्दा बढी अष्ट्रेलियमा निर्यात भएको विभागको तथ्याङ्कमा उल्लेख छ । साउनमा अष्ट्रेलियमा ७१ लाख ६४ हजार रुपैयाँ बराबरको ४४ केजी बढीको चाँदीका गहना पुगेको हो ।
यस्तै, जर्मनीमा ३४ लाख ३० हजार रुपैयाँ, जापानमा २३ लाख ६१ हजार, क्यानडामा १३ लाख १४ हजार रुपैयाँ बराबरको गहना निर्यात भएको छ ।
त्यसैगरि स्वीट्जरल्याण्डमा ६ लाख ३२ हजार, बेलायतमा ५ लाख ७२ हजार, बेल्जियममा ४ लाख २२ हजार, फ्रान्समा २ लाख ४५ हजार, नेदरल्याण्डमा २ लाख २७ हजार रुपैयाँ बराबरको चाँदीका गहना निर्यात भएको हो ।
वि.सं.२०७८ भदौ १७ बिहीवार १०:४० मा प्रकाशित