काठमाडौं । साताको पहिलो कारोबार दिन सेयर बजारमा भारी अंकको गिरावट आएको छ । आइतबार बजार १०८.२६ अंकले घटेको हो ।
बजार परिसुचक पनि २८१८.७२ अंकको बिन्दुमा पुगेर बन्द भएको छ । उक्त दिन कारोबार रकम पनि खुम्चिएको छ । आज ११ अर्ब २४ करोड ३ लाख ९१ हजार रुपैयाँ बराबरको कारोबार भएको छ ।
उक्त दिन कारोबार सुरु भएको करिब २ घन्टामा बजार ५.०३ प्रतिशतले घटेसँगै ४० मिनेट सेयर कारोबार भएको थियो । सेयर बजारमा भारी गिरावट आउँदा लगानीकर्ता त्रसित बनेका छन् ।
कारोबारको सुरुदेखि नै घटेको अहिले लगानीकर्ताले राष्ट्र बैंकको नीतिका कारण बजार घटेको आरोप लगाइरहेका छन् । पछिल्लो समय बजारमा देखिएको बियरिस ट्रेन्डले नयाँ लगानीकतर्चालाई भने निकै हतोत्साहित बनाएको छ ।
बजार निरन्तर गति लिइरहेको समयमा राष्ट्र बैंकले लिएको गलत नीतिका कारण बजारमा पहिरो चलेको जानकारहरुको भनाई छ । राष्ट्र बैंकले मार्जिन प्रकृतिको कर्जामा ४ र १२ करोड रुपैयाँको सीमा लगाएको छ ।
यो नै पुँजी बजारको बाधक भएको लगानीकर्ताहरुको बुझाई रहेको छ । यो व्यवस्था तत्काल खारेजी गर्न सबैले माग गरिरहेका छन् ।
वि.सं.२०७८ भदौ २० आइतवार १५:१३ मा प्रकाशित