काठमाडौं । सरकारले आसनन चाडवाडलाई लक्षित गरि असोज १ गतेदेखि देशभर सहुलियत पसल संचालन गर्ने भएको छ ।
कात्तिक २४ गते छठ पर्वसम्म देशका विभिन्न ३९ स्थानहरुमा सहुलियत पसल सञ्चालन गर्ने भएको हो ।
एक सूचना निकाल्दै उद्योग, वाणिज्य तथा आपूर्ति मन्त्रालयले सहुलियत पसलमा छुटसहित खाद्यवस्तुको बिक्री गर्ने मन्त्रालयले घोषणा गरेको हो ।
जसअनुसार मोटा/मसिनो चामलमा प्रतिकिलो ५ रुपैयाँ, सिमी र फापर प्रतिकिलो १० रुपैयाँ, नुन प्रतिकिलो २ रुपैयाँ, चिनी प्रतिकिलो ५ रुपैयाँ छुट पाइने छन ।
यसैगरी, खसीबोका प्रतिकिलो १० रुपैयाँ र दुग्ध विकास संस्थानबाट बिक्री हुने दुध, पनिर, घ्यूसमेतका दुग्धजन्य पदार्थहरुमा पनि छुट दिई बिक्री वितरण गरिने भएको छ ।
चाडवाडलाई लक्षित गरि खाना पकाउने एलपि ग्यास र पेट्रोलियम पदार्थको आपूर्तिलाई थप सहज तुल्याउन नेपाल आयाल निगमलाई निर्देशन दिएको मन्त्रालयले जनाएको छ ।
चाडवाडको समयमा खरिद बिक्री र उपभोग बढ्ने भएकाले उपभोग्य बस्तुको मूल्य, गुणस्तर र तौल लगायतका विषयमा कार्ययोजना बनाई थप सघन र संयुक्त अनुगम गर्ने मन्त्रालय निर्णय गरेको छ ।
वि.सं.२०७८ भदौ २३ बुधवार १७:०९ मा प्रकाशित
