काठमाडौं । लगानी बोर्डको १०औं वार्षिकोत्सवको अवसरमा दिगो पूर्वाधार विकास तथा सार्वजनिक निजी साझेदारी अवधारणा मार्फत पूर्वाधार विकासका अवसर र चुनौतिबारे दुईवटा बेग्लाबेग्लै छलफल भएका छन् ।
राष्ट्रिय योजना आयोगका उपाध्यक्ष डा. विश्वनाथ पौडेलको अध्यक्षतामा ‘नेपालमा दिगो पूर्वाधारको विकास’ विषयमा छलफल भएको छ ।छलफलमा नेपालमा वातावरणिय दृष्टिकोणले दिगो पूर्वाधार विकास हुनुपर्नेमा जोड दिए । नेपाल जस्तो मुलुकमा प्राकृतिक प्रकोप ज्यादा हुने भएकोले प्राकृतिक प्रकोप सामना गर्न सक्ने पूर्वाधारको निर्माण गर्नु पर्नेमा जोड रहेको छ ।
नेपालको आर्थिक विकासमा सडक संजालको भूमिका अत्यन्त महत्वपूर्ण हुने भएपनि सडक पूर्वाधार कमजोर रहेकाले सरकारले गुणस्तरीय यातायात पूर्वाधार विकासमा जोड दिनुपर्ने वक्ताहरुको सुझाव थियो ।
वक्ताहरुले जलवायू परिवर्तनले पार्ने प्रभावलाई न्यूनीकरण गर्न हरित जलवायू कोषमा नेपालको पहुँच बढाउनु पर्नेमा समेत जोड दिनुभयो । छलफलमा नेपालमा हरित र दिगो पूर्वाधारको विकासका सम्भावना, वर्तमान कानूनी व्यवस्थाहरु, लगानीका अवसरहरु तथा चुनौति एवम् सार्वजनिक–निजी साझेदारी लगायत परियोजना विकासका संयन्त्रहरु, आपसी सहकार्यका सम्भावनाहरुबारे छलफल भयो ।
यस्तै नेपालको आर्थिक विकासका लागि सार्वजनिक–निजी साझेदारीको विकास र व्यबस्थापन विषयमा पनि छलफल भएको छ । कोभिडका कारण विश्वभर नै लगानी घटिरहेको र कतिपय लगानीकर्ताहरु नयाँ लगानीको गन्तव्य खोजी गरिरहेको अवस्थामा नेपालले त्यस्ता लगानीकर्ताहरुलाई सार्वजनिक-निजी साझेदारीका परियोजनाहरुमा आकर्षित गर्नुपर्नेमा सबैको जोड रहेको थियो ।
छलफलमा वक्ताहरुले नेपालमा सार्वजनिक निजी साझेदारीका परियोजना अगाडि बढाउन सरकार, निजीक्षेत्र तथा स्थानीय सरकार र स्थानीय समुदायहरुबीच समन्वय र सहकार्य गर्नुपर्नेमा जोड दिनुभयो ।
वि.सं.२०७८ भदौ २३ बुधवार १८:२७ मा प्रकाशित
